ऋतुजा बागवेचं नवीन हॉटेल पाहिलंत का? मराठमोळं इंटिरियर, हटके नेमप्लेट अन्...; 'या' कलाकारांनी दिली भेट

लोकप्रिय अभिनेत्री ऋतुजा बागवेने व्यवसाय क्षेत्रात पदार्पण करत नवीन रेस्टॉरंट सुरू केलं आहे. ऋतुजाच्या नवीन रेस्टॉरंटच्या उद्घाटन सोहळ्याला लोकप्रिय अभिनेता सुबोध भावे व त्याची पत्नी देखील उपस्थित होती. ऋतुजा बागवेने अंधेरी पूर्व, मरोळ परिसरात तिचं नवीन रेस्टॉरंट सुरू केलं आहे. तिच्या नव्या हॉटेलचं नाव आहे ‘फूडचं पाऊल’. अभिनेत्रीच्या नव्या हॉटेलची नेमप्लेट व लोगो खूपच लक्षवेधी आहे. याशिवाय अभिनेत्रीने तिच्या नव्या हॉटेलच्या इंटिरियला मराठमोळा टच दिल्याचं पाहायला मिळत आहे. रेस्टॉरंटमधील एका भिंतीवर सुंदर असं मरोळ मेट्रो स्टेशन परिसरातील चित्र रेखाटण्यात आलं आहे. अभिनेत्रीच्या नव्या हॉटेलला भेट देण्यासाठी पहिल्याच दिवशी ओमप्रकाश शिंदे, प्राजक्ता माळी असे बरेच कलाकार पोहोचले होते. याशिवाय तितीक्षा तावडे, ऐश्वर्या नारकर, सिद्धार्थ बोडके, सुरुची अडारकर या कलाकारांनी सुद्धा अभिनेत्रीच्या नव्या हॉटेलच्या उद्घाटन सोहळ्याला उपस्थिती लावली होती. 'फूडचं पाऊल' या रेस्टॉरंटमध्ये खवय्यांना व्हेज व नॉन व्हेज अशा दोन्ही पदार्थांचा आस्वाद घेता येणार आहे. दरम्यान, सध्या संपूर्ण मराठी मनोरंजन विश्वातून ऋतुजावर या नव्या हॉटेलसाठी शुभेच्छांचा वर्षाव करण्यात येत आहे. ( सर्व फोटो सौजन्य : ऋतुजा बागवे इन्स्टाग्राम, last benchers stories )