...म्हणून मी कर्जत-जामखेडमधूनच निवडणूक लढवली, तब्बल ४ वर्षांनी रोहित पवारांचा खुलासा

महाराष्ट्रातील राजकीय व्यक्तीमत्वांपैकी एक लोकप्रिय नाव म्हणजे रोहित पवार. शरद पवारांचे नातू आणि राष्ट्रवादी काँग्रेसचे आमदार म्हणून ते कायमच चर्चेत असतात. महाविकासआघाडीची सत्ता असताना आणि आता सत्ता गेल्यानंतरही ते सातत्याने चर्चेत असल्याचे पाहायला मिळते. राष्ट्रवादी काँग्रेस पक्षाचे युवा नेतृत्व म्हणून त्यांना ओळखले जाते. रोहित पवारांनी नुकतीच ‘मराठी किडा’ या युट्यूब चॅनेलला मुलाखत दिली. या मुलाखतीत रोहित पवारांना वैयक्तिक व राजकीय प्रश्नही विचारण्यात आले. या मुलाखतीत विचारलेल्या सगळ्या प्रश्नांना त्यांनी अगदी दिलखुलासपणे उत्तरे दिली. यावेळी रोहित पवारांना कर्जत-जामखेड मतदारसंघाबद्दल प्रश्न विचारण्यात आला. 'बारामतीत इतकं मोठं प्रस्थ असताना कर्जत जामखेडमधून निवडणूक का लढवली?' असा प्रश्न यावेळी विचारण्यात आला. त्यावर त्यांनी फार स्पष्टपणे उत्तर दिले. "मी तिथे गेलो आणि मला तिकडची लोकं आवडली." "त्याबरोबरच लोकांचीही इच्छा होती." "त्या ठिकाणी काहीच विकास झाला नव्हता." "तिथे गेल्यानंतर मी विकास करु शकतो, हा विचार ठेवून मी निवडणूक लढलो." "मी तिकडे जिंकेन की हरेन याचा विचारच केला नाही." एक मोठा नेता माझ्याविरोधात उभा असतानाही लोकांनी छोट्या कार्यकर्त्याला, नवीन कार्यकर्त्याला निवडून दिलं, त्यातूनच समजत की तिकडची लोक ही मोठ्या मनाची आहेत, असेही रोहित पवार म्हणाले. दरम्यान रोहित पवारांनी २०१९ च्या विधानसभा निवडणुकीत भाजपाचे उमेदवार राम शिंदे यांचा पराभव केला होता. राम शिंदे यांना हरवून रोहित पवार पहिल्यांदा आमदार झाले. (सर्व फोटो - रोहित पवार/ फेसबुक)