Gujarat Election Exit Poll: गुजरातमध्ये 'सातवी बार भाजपा सरकार'चा अंदाज! केजरीवालांची पहिली प्रतिक्रिया; म्हणाले, "एका नव्या.." | Arvind Kejriwal On Gujarat Exit Polls That Predict Poor AAP Show scsg 91 | Loksatta

Gujarat Election Exit Poll: गुजरातमध्ये ‘सातवी बार भाजपा सरकार’चा अंदाज! केजरीवालांची पहिली प्रतिक्रिया; म्हणाले, “एका नव्या..”

Kejriwal on Gujarat Election Exit Polls: आक्रमक प्रचाराद्वारे मोठी हवा निर्माण केलेल्या ‘आप’ला फारसं यश न मिळण्याचे मतदानोत्तर चाचण्यांचे संकेत

Gujarat Election Exit Poll: गुजरातमध्ये ‘सातवी बार भाजपा सरकार’चा अंदाज! केजरीवालांची पहिली प्रतिक्रिया; म्हणाले, “एका नव्या..”
केजरीवाल यांची पहिली प्रतिक्रिया (लोकसत्ता ग्राफिक्स टीम)

Gujarat Election 2022 Exit Polls Result: आम आदमी पार्टीचे सर्वेसर्वा आणि दिल्लीचे मुख्यमंत्री अरविंद केजरीवाल यांनी मतदानोत्तर चाचण्यांवर म्हणजेच एग्झिट पोलवर पहिली प्रतिक्रिया नोंदवली आहे. गुजरात विधानसभा निवडणुकीत भाजपा मोठे बहुमत मिळवून सलग सातव्यांदा सत्तेवर येईल, असा अंदाज मतदानोत्तर चाचण्यांनी सोमवारी वर्तवला आहे. गुजरातमध्ये यंदा आपने पूर्ण जोर लावत भाजपाला आव्हान देण्याचा प्रयत्न केला होता. मात्र यामध्ये आपला फारसं यश येणार नाही असा एग्झिट पोल्सचा अंदाज आहे.

गुजरातसंदर्भातील एग्झिट पोल काय सांगतात?

गुजरात विधानसभा निवडणुकीच्या मतदानाचा दुसरा टप्पा सोमवारी पार पडल्यानंतर विविध संस्थांच्या मतदानोत्तर सर्वेक्षणांतील अंदाज जाहीर करण्यात आले. त्यानुसार गुजरातमध्ये भाजपाला १८२ जागांपैकी ११७ ते १५१ जागा आणि काँग्रेससह त्याच्या मित्रपक्षांना १६ ते ५१ जागा मिळतील, असा अंदाज आहे. आक्रमक प्रचाराद्वारे मोठी हवा निर्माण केलेल्या ‘आप’ला मात्र तीन ते १३ जागांवर समाधान मानावे लागेल, असे अंदाज आहेत. बहुमतासाठी ९२ जागा जिंकणे आवश्यक आहे. आपच्या पदरी गुजरामध्ये निराशाच पडणार असली तरी दिल्ली महापालिकेत ‘आप’ला स्पष्ट बहुमत मिळेल आणि भाजपाची १५ वर्षांची सत्ता संपुष्टात येईल, असा अंदाज तीन मतदानोत्तर चाचण्यांनी वर्तवला आहे. याच पार्श्वभूमीवर अरविंद केजरीवाल यांनी पहिली प्रतिक्रिया नोंदवलीय.

केजरीवाल नेमकं काय म्हणाले?

“हे निकाल सकारात्मक आहेत,” असं केजरीवाल यांनी म्हटलं आहे. “एका नव्या पक्षाला १५ ते २० टक्के मतदान होतं आणि ते सुद्धा भाजपाचा बालेकिल्ला असलेल्या ठिकाणी ही फार मोठी गोष्ट आहे,” असंही केजरीवाल यांनी म्हटल्याचं वृत्त एनडीटीव्हीने दिलं आहे. ‘आज तक- अ‍ॅक्सिस’च्या अंदाजानुसार ‘आप’चे उमेदवार दिल्ली महानगरपालिकेच्या निवडणुकीमध्ये १४९ ते १७१ प्रभागांमध्ये विजय संपादन करतील, तर भाजपाला ६९ ते ९१ जागा मिळतील. ‘टाइम्स नाऊ-इटीजी’च्या चाचणीनुसार ‘आप’ला १४६ ते १५६, भाजपाला ८४ ते ९४ आणि काँग्रेसला ६ ते १० प्रभागांमध्ये विजय मिळेल. ‘द न्यूज एक्स’च्या सर्वेक्षणात ‘आप’ला १५९ ते १७५ आणि भाजपाला ७० ते ९२ जागा मिळतील. याच अंदाजांच्या आधारे केजरीवाल यांनी निकालाला सकारात्मक म्हटलं असून १५ ते २० टक्के मतदानाचा उल्लेख गुजरातमधील एग्झिट पोल्सच्या पार्श्वभूमीवर केला आहे.

नक्की वाचा >> “हेच त्यांचे देशप्रेम का? राज्यावरील बेगडी प्रेम त्यांच्या…”; मोदी भेटीनंतर CM शिंदेंचा उद्धव ठाकरेंना टोला! ‘मविआ’च्या मोर्चावरही बोलले

हिमाचलमध्ये चुरस…

हिमाचल प्रदेशात सत्ताधारी भाजपा आणि काँग्रेसमध्ये अटीतटीची लढत होऊन भाजपा काठावरच्या बहुमताद्वारे सलग दुसऱ्यांदा सत्ता स्थापन करेल, असा चाचण्यांचा निष्कर्ष आहे. हिमाचलमध्ये भाजपाला २४ ते ४१, तर काँग्रेसला २४ ते ४० जागा मिळतील, असे भाकीत वर्तवण्यात आले आहे. ‘आप’च्या खात्यात जेमतेम तीन जागा पडतील, असा अंदाज आहे. या राज्यात विधानसभेच्या ६८ जागा असून बहुमतासाठी ३५ हा जादुई आकडा आहे. तथापि, दोन सर्वेक्षणांचे अपवाद वगळले तर सर्वच मतदानोत्तर चाचण्यांच्या अंदाजांनुसार हिमाचलमध्ये भाजपाच निर्विवाद बहुमताद्वारे पुन्हा सत्ता स्थापन करेल. भिन्न अंदाज वर्तवणाऱ्या दोन चाचण्यांनुसार भाजपा आणि काँग्रेसमध्ये सत्तेसाठी तीव्र रस्सीखेच होईल.

नक्की वाचा >> कर्नाटकने सामंजस्य दाखवायला हवे होते!; मंत्र्यांच्या बेळगाव दौऱ्याबाबत मुख्यमंत्री एकनाथ शिंदे यांचे स्पष्टीकरण

मतमोजणी कधी?

गुजरात आणि हिमाचल या दोन्ही राज्यांतील मतमोजणी गुरुवारी, ८ डिसेंबरला होणार आहे. हिमाचल प्रदेश विधानसभेसाठी १२ नोव्हेंबरला, तर गुजरातमध्ये १ आणि ५ डिसेंबरला दोन टप्प्यांत मतदान घेण्यात आले.

मराठीतील सर्व देश-विदेश ( Desh-videsh ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

First published on: 06-12-2022 at 12:18 IST
Next Story
उद्धव ठाकरे आणि प्रकाश आंबेडकरांच्या युतीवर रामदास आठवलेंची प्रतिक्रिया; म्हणाले, “सगळी भीमशक्ती माझ्याबरोबर असल्याने…”