अमित ठाकरे यांनी भोंग्याचा केक कापून केला वाढदिवस साजरा | MNS Raj Thackeray Son Amit Thackeray Birthday Celebration with Speaker Cake sgy 87

मनसे अध्यक्ष राज ठाकरे यांचे चिरंजीव अमित ठाकरे यांचा आज वाढदिवस आहे. अमित ठाकरे यांचा वाढदिवस असल्याने त्यांना शुभेच्छा देण्यासाठी मनसैनिकांनी रात्रीपासून गर्दी केली होती. अमित ठाकरे यांचं निवासस्थान असणाऱ्या शिवतीर्थबाहेर शुभेच्छा देण्यासाठी रात्रीपासून मनसैनिक जमले होते. रात्री कार्यकर्त्यांकडून लेझर शोच्या माध्यमातून अमित ठाकरेंना वाढदिवसाच्या शुभेच्छा देण्यात आल्या. शिवतीर्थाच्या बाहेर कार्यकर्त्यांकडून लेझर लाईट शोचं आयोजन करण्यात आलं होतं. अमित ठाकरे यांनी शिवतीर्थाबाहेर येत कार्यकर्त्यांच्या शुभेच्छा स्वीकारल्या. दरम्यान अमित ठाकरे यांना आजही भेटण्यासाठी कार्यकर्त्यांनी मोठी गर्दी केली होती. अमित ठाकरे यांनी यावेळी सर्वांची भेट घेत शुभेच्छांचा स्विकार केला. दरम्यान यावेळी त्यांच्या केकने मात्र सर्वाचं लक्ष वेधलं. मनसे पक्ष भोंग्याविरोधी आंदोलनामुळे चर्चेत असून अमित ठाकरेंच्या वाढदिवसालाही हा भोंगा पहायला मिळाला. अमित ठाकरेंसाठी आणलेल्या केकवर भोंग्याचं चित्र होतं. मनसेने मशिदींवरील भोंग्याला विरोध केला असून याविरोधात मोठं आंदोलनही करण्यात आलं. जोपर्यंत भोंगे पूर्णपणे काढले जात नाहीत तोवर हे आंदोलन सुरु राहणार असल्याचं राज ठाकरे म्हणाले आहेत. अमित ठाकरेंच्या वाढदिवसाला त्यांच्या मातोश्री शर्मिला ठाकरेदेखील उपस्थित होत्या. २३ जानेवारी २०२० रोजी अमित ठाकरे यांचं राजकीय लॉन्चिंग करण्यात आलं. मुंबईतील सभेत त्यांची नेतेपदी निवड करण्यात आली होती. अमित ठाकरे यांनी मुंबईतील डीजी रुपारेल कॉलेजमधून कॉमर्समधून पदवीचे शिक्षण घेतले आहे. ते राजकारणात पूर्णपणे सक्रिय नव्हते तेव्हा सोशल मीडियाच्या माध्यमातून सामान्य नागरिकांच्या समस्या मांडत होते. अमित यांनी मनसेच्या काही आंदोलनांमध्ये देखील सहभाग घेतला होता. अमित देखील एक उत्तम चित्रकार आहेत हे फार कमी जणांना माहित आहे. अमित ठाकरे यांनी आपल्या बालमैत्रिणीशी म्हणजेच मिताली बोरुडे हिच्याशी लग्न केलं असून नुकतेच वडील झाले आहेत.