Crowd of devotees in Shegaon on the sant-gajanan-maharaj-145-prakat-din

श्री संत गजानन महाराज यांचा आज १४५ वा प्रकट दिन आहे. यानिमित्ताने बुलढाण्यातील शेगावात लाखो भक्तांची मांदियाळी बघायला मिळत आहे. राज्यभरातील आणि शेजारील मध्य प्रदेशातील तसंच गुजरातमधून सुद्धा जवळपास एक हजाराच्या वर दिंड्यासह लाखो भाविक शेगावात दाखल झाले आहेत. "श्री गजानन महाराज की जय" आणि "गण गण गणांत बोते" च्या जयघोषात संपूर्ण शेगाव दुमदुमुन निघाले आहे. शेगावच्या संत गजानन महाराज मंदिरात आज दिवसभर अनेक धार्मिक कार्यक्रमांचे आयोजन करण्यात आलं आहे. केवळ शेगावातच नव्हे तर संत गजानन महाराज यांचे मठ असलेल्या राज्यातील विविध ठिकाणीही विविध कार्यक्रमांचे आयोजन आजच्या दिवशी केले जाते. श्री गजानन महाराज प्रकट दिन हा एक शुभ दिवस मानला जातो. गजानन महाराजांच्या प्रकटदिनी दिवशी शेगाव इथून श्री गजानन महाराजांच्या मंदिरातून पालखी काढली जाते आणि त्यांच्या पादुकांचे पूजन केले जातात. महाराजांच्या प्रकट दिनी हजारो भक्त, लोक शेगाव इथे प्रार्थना करण्यासाठी आणि आशीर्वाद घेण्यासाठी हजेरी लावतात. 'गण गण गणात बोते'चा गजर, अभिषेक, पालखी, पारायण अशा धार्मिक वातावरणात श्री गजानन महाराज प्रकट दिन सोहळा साजरा करण्यात येतो. गजानन महाराजांच्या प्रकटदिनानिमित्त संपूर्ण मंदिर परिसर सजवण्यात आले आहे. इतर राज्यातून हजारो भाविक आपल्या दिंड्या घेऊन शेगावात दाखल झाल्या आहेत. सर्व भाविक पूजा, दान, सत्संग, प्रार्थना आणि अन्नदान यांमध्ये विशेष सहभाग नोंदवतात.