Ashadhi Ekadashi 2025 Vitthal Rukmini Temple Lighting Photos

Shree Vitthal Rukmini Temple Pandharpur: आषाढी एकादशीनिमित्त पंढरपूर येथील श्री विठ्ठल-रुक्मिणी मंदिराला आकर्षक विद्युत रोषणाई करण्यात आली आहे. श्री. विठ्ठल रुक्मिणी मंदिरातील श्री विठ्ठल सभा मंडप, मंदिरातील आतील व बाहेरील बाजूस, श्री संत नामदेव पायरी या ठिकाणी तिरंग्याची आकर्षक रोषणाई करण्यात आली आहे. याशिवाय, श्री संत ज्ञानेश्वर दर्शन मंडप, श्री संत तुकाराम भवन, श्री विठ्ठल रुक्मिणी भक्त निवास इत्यादी ठिकाणी देखील रोषणाई करण्यात आली आहे. श्री विठ्ठल रुक्मिणी मंदिर, पंढरपूर हे महाराष्ट्रातील एक अत्यंत पवित्र आणि प्रसिद्ध तीर्थक्षेत्र आहे. हे मंदिर सोलापूर जिल्ह्यातील पंढरपूर शहरात भीमा नदीच्या (चंद्रभागा) काठी वसलेले आहे. आषाढी एकादशीला लाखो वारकरी भक्त मोठ्या भक्तिभावाने वारी करतात. विठू नामाचा गजर करत असंख्य पालख्या पंढरपूरकडे मार्गस्थ झाल्या आहेत. संपूर्ण महाराष्ट्रातून आणि इतर राज्यांतून पायी चालत येणाऱ्या वारकऱ्यांचा हा उत्सव विशेष प्रसिद्ध आहे. ‘'बोलावा विठ्ठल पहावा विठ्ठल । करावा विठ्ठल जीवभाव ॥' या अभंगाची प्रचीती आज प्रत्येक वारकरी आणि विठ्ठल भक्त घेत नित्यनेमाने घेत असतो. पृथ्वीवरील सर्वांत पुरातन तीर्थक्षेत्र म्हणून पंढरपूरचा उल्लेख केला जातो. (सर्व फोटो सौजन्य : श्री विठ्ठल रुक्मिणी मंदिर समिती पंढरपूर अधिकृत) (हेही पाहा : आषाढी एकादशीनिमित्त मायरा वायकुळचं निळ्या खणाच्या ड्रेसमध्ये फोटोशूट)