मतदारसंघ यादी

काही दिवसांपूर्वी निवडणुक आयोगाने पाच राज्यांमध्ये निवडणुका होणार असल्याचे जाहीर केले. यामध्ये ईशान्येकडील मिझोराम या राज्याचाही समावेश आहे. राज्यातील विद्यमान विधानसभेची मुदत १७ डिसेंबर रोजी संपुष्टात येत आहे. मिझोराममध्ये विधानसभेच्या ४० जागांसाठी ७ नोव्हेंबर रोजी मतदान होणार आहे. तसेच मतदानाचा निकाल ३ डिसेंबर रोजी जाहीर केला जाईल. राज्यात ८.५ लाख लोकांकडे मतदान करण्याचा अधिकार आहे. मिझोराम विधानसभेच्या ४० जागांपैकी ३९ जागा या अनुसूचित जमाती प्रवर्गातील उमेदवारांसाठी राखीव ठेवण्यात आल्या आहेत. २०१८ मध्ये मिझो नॅशनल फ्रंट (MNF) या पक्षाने ४० पैकी २६ जागांवर विजय मिळवत राज्यामध्ये सरकार स्थापन केले होते. मिझोरामचे सध्याचे मुख्यमंत्री झोरामथांगा आणि मिझो नॅशनल फ्रंट आपली सत्ता टिकवण्याचा प्रयत्नात दिसत आहेत. प्रमुख विरोधी पक्ष असलेल्या झोरम पीपल्स मूव्हमेंट (ZPM) बरोबरच काँग्रेसनंही कंबर कसली आहे. २०१८ मध्ये झोरम पीपल्स मूव्हमेंटला ८ जागा मिळाल्या होत्या, तर काँग्रेसला ५ आणि भाजपाला फक्त एका जागेवर समाधान मानावे लागले होते.