असा होता गायक केके यांचा जीवनप्रवास....

केके उर्फ कृष्ण कुमार कन्नथ हे बॉलिवूड इंस्ट्रीत मोठं व्यक्तिमत्त्व मानले जात होते. त्यांचा जन्म २३ ऑगस्ट १९६८ रोजी दिल्ली येथे झाला. दिल्ली येथेच राहणाऱ्या केके यांनी किरोडीमल महाविद्यालयातून शिक्षण पूर्ण केलं. शिक्षण घेत असतानाच त्यांनी स्टेजवर सहज एक गाणं गायलं होतं. त्यानंतरच त्यांना गाण्याची आवड निर्माण झाली. लहानपणापासूनच केके यांना संगीताची आवड होती. इतर गाणी ऐकत आणि त्यामधून शिकत त्यांनी आपलं करिअर घडवलं. संगीताचं शिक्षण घेतलेलं नसतानाही आपल्या टॅलेंटच्या जोरावर त्यांनी बरीच हीट गाणी गायली आणि त्यातून प्रसिद्धी देखील मिळवली. केके यांनी त्यांचं खासगी आयुष्य मात्र या प्रसिद्धीपासून नेहमीच दूर ठेवलं. केके यांनी त्यांच्या बालमैत्रिणीशी लग्न केलं होतं. त्यांच्या पत्नीचं नाव ज्योती आहे. लग्नाआधी केके यांना नोकरी शोधावी लागली होती. त्यावेळी काहीच पर्याय नसल्यानं त्यांनी सेल्समन म्हणूनही काम केलं. पण ६ महिन्यांतच ते आपल्या नोकरीला कंटाळले आणि त्यांनी ही नोकरी सोडली. या काळात त्यांना त्यांचे वडील आणि पत्नी यांची खंबीर साथ मिळाली आणि त्यांनी संगीत क्षेत्रात आपलं करिअर सुरू केलं. २६ वर्षांच्या बॉलिवूड करिअरमध्ये केके यांनी तमिळ, तेलुगू, मल्याळमसह इतरही काही भाषांमध्ये गाणी गायली.