लेकीच्या येण्याने निक जोनसच्या आयुष्यात झाला मोठा बदल, म्हणाला "तिला पाहिल्यावर..."

बॉलिवूडसह हॉलिवूड गाजवणारी अभिनेत्री म्हणून प्रियांका चोप्राला ओळखले जाते. प्रियांका चोप्रा आणि निक जोनस हे सरोगसीच्या माध्यमातून आई-बाबा झाले. त्यांनी सोशल मीडियावर याबाबतची गुडन्यूज दिली होती. बाळाची गुडन्यूज दिल्यानंतर सर्वजण प्रियांका-निकच्या मुलीची एक झलक पाहण्यासाठी फार उत्सुक असल्याचे पाहायला मिळत आहे. सध्या प्रियांका आणि निक हे त्यांच्या सहा महिन्याच्या मुलीसोबत पिकनिक एन्जॉय करत आहेत. प्रियांका चोप्रा आणि निक जोनस यांच्या बाळाची सध्या सोशल मीडियावर चर्चा पाहायला मिळत आहे. नुकतंच एका मुलाखतीत निक जोनसला पालक झाल्यानंतरचा अनुभव विचारण्यात आला. यावेळी निक जोनस म्हणाला, "आई-वडील झाल्यानंतर प्रत्येकाचे आयुष्य बदलते ही गोष्ट माझ्याबाबतीतही तंतोतंत खरी आहे." "माझ्या मुलीच्या येण्याने माझेही आयुष्य खरोखरच बदलले आहे. मालती खरंच खूप गोड आहे. तिला पाहिल्यावर मला खूप आनंद होतो", असे निक जोनसने म्हटले. यावेळी त्याला प्रियांकाच्या गोल्फ खेळातील आवडीनिवडीबद्दल विचारण्यात आले. त्यावर तो म्हणाला, "प्रियांका ही सध्या गोल्फ खेळाला प्राधान्य देते. ती गोल्फच्या कपड्यात फार चांगली दिसते. त्यामुळेच तिला तो खेळ आवडतो." दरम्यान प्रियांका चोप्रा आणि निक जोनस यांचं बाळ २७ व्या आठवड्यात जन्माला आलं आहे. नियोजनानुसार बाळाचा जन्म एप्रिल महिन्यात होणार होता. मात्र त्या आधीच त्याचा जन्म झाल्यानं बाळाला रुग्णालयातच डॉक्टरांच्या देखरेखीखाली ठेवण्यात आलं होतं. त्यानंतर आता काही महिन्यांपूर्वी प्रियांका आणि निकने त्यांच्या बाळाला घरी आणले आहे. काही दिवसांपूर्वी त्यांनी त्यांच्या बाळासोबतचे फोटो शेअर केले होते. मात्र यातील एकाही फोटोत प्रियांकाच्या बाळाचा चेहरा समोर आलेला नाही. त्यामुळे तिचा चेहरा पाहण्यासाठी प्रियांकाचे चाहते उत्सुक असल्याचे पाहायला मिळत आहे.