'दहावीत किती टक्के गुण मिळाले होते?' रणबीर कपूर म्हणाला, "मी पास..."

अभिनेता रणबीर कपूर हा लवकरच ‘शमशेरा’ आणि ‘ब्रह्मास्त्र’ या चित्रपटातून प्रेक्षकांच्या भेटीला येणार आहे. त्यासोबत रणबीर आणि आलियाने चाहत्यांना गोड बातमी दिली आहे. रणबीर हा लवकरच बाबा होणार आहे. काही दिवसांपूर्वी आलिया भट्टने एक फोटो शेअर करत तिच्या प्रेगेंन्सीची बातमी शेअर केली होती. तेव्हापासून रणबीर कपूरही चर्चेत आला आहे. रणबीर कपूरच्या चारही पिढ्या या सिनेसृष्टीत असल्या तरी त्यांच्यात कोणीही उच्च शिक्षण घेतलेले नाही. त्यामुळे रणबीर हा दहावी पास झाल्यानंतर कपूर कुटुंबियांनी घरी जंगी पार्टी केली होती. नुकतंच एका मुलाखतीदरम्यान रणबीरने याबाबतचा किस्सा सांगितला आहे. यावेळी त्याने त्याला दहावीला किती टक्के गुण मिळाले होते? याबद्दलही सांगितले आहे. "मी अभ्यासात फार हुशार नव्हतो. मी माझ्या कुटुंबातील पहिला मुलगा आहे ज्याने दहावीची परीक्षा पास केली आहे", असे रणबीर म्हणाला. "मला दहावीत ५३.४ टक्के मिळाले होते. जेव्हा माझ्या परीक्षेचा निकाल लागला. तेव्हा माझे कुटुंबीय फार आनंदात होते", असेही रणबीरने सांगितले. "त्यावेळी माझ्या कुटुंबाने खूप मोठ्या पार्टीचे आयोजन केले होते. मी दहावी पास होईन की नाही याची त्यांना अजिबात खात्री नव्हती", असा खुलासाही रणबीरने केला. "मी माझ्या कुटुंबातील पहिला मुलगा आहे ज्याने १० वीची परीक्षा उत्तीर्ण केली आहे. मी अभ्यासात फार कच्चा होतो", असेही त्याने म्हटले. दरम्यान याआधीही रणबीर कपूरने २०१७ मध्ये दिलेल्या एका मुलाखतीतही तो कपूर कुटुंबातील सर्वात सुशिक्षित व्यक्त असल्याचे सांगितले होते. "माझ्या कुटुंबाचा शैक्षणिक इतिहास फारसा चांगला नाही. मी ८ वी पास नापास आहे. तर माझे काका ९ वी नापास आणि आजोबा ६ वी नापास आहेत. त्यामुळे मी माझ्या कुटुंबात खरोखरच सर्वात जास्त शिकलेला व्यक्ती आहे", असे त्याने या मुलाखतीत म्हटले होते.