गुपचूप साखरपुडा, लग्न मात्र दणक्यात; प्रसाद जवादे-अमृता देशमुख 'या' तारखेला अडकणार विवाहबंधनात

‘बिग बॉस मराठी’च्या चौथ्या पर्वातून प्रसिद्धीझोतात आलेली जोडी म्हणजे अमृता देशमुख आणि प्रसाद जवादे लवकरच विवाहबंधनात अडकणार आहेत. अमृता देशमुख आणि प्रसाद जवादेने गुपचूप साखरपुडा उरकला आहे. त्यांनी सोशल मीडियावर फोटो शेअर करत चाहत्यांना ही गुडन्यूज दिली आहे. अमृता आणि प्रसादने त्यांच्या लग्नाची तारीखही जाहीर केली आहे. अमृता आणि प्रसादने शेअर केलेल्या या फोटोत त्या दोघांच्या हातात अंगठी पाहायला मिळत आहे. यावेळी प्रसादने गुलाबी रंगाचा शर्ट परिधान केला होता. तर अमृताने पांढऱ्या रंगाचा ट्रेडिनशल ड्रेस परिधान केला होता. "आम्ही साखरपुडा केला आहे. आम्ही दोघांनीही आयुष्यभर एकत्र एका टीममध्ये राहण्याचा निर्णय घेतलाय." "तसेच आता आमच्या मार्गात येणारे कोणतेही कार्य पार पाडण्यास आम्ही सज्ज आहोत", असे बिग बॉस स्टाईल कॅप्शन तिने या फोटोंना दिले आहे. अमृता आणि प्रसादने साखरपुड्याची गुडन्यूज दिल्यानंतर त्यांच्या फोटोवर अनेक कलाकार कमेंट करताना दिसत आहेत. तेजश्री प्रधान, प्रार्थना बेहेरे, अक्षय केळकर, सायली संजीव, तेजस्विनी पंडित, नम्रता संभेराव, प्रियांका केतकर, अश्विनी महांगडे यांसह अनेक कलाकारांनी त्यांचे अभिनंदन केले आहे. अमृताने साखरपुड्याचे फोटो शेअर करत त्यांच्या लग्नाची तारीखही जाहीर केली आहे. येत्या १८ नोव्हेंबरला अमृता आणि प्रसाद लग्नबंधनात अडकणार आहेत.