![maharashtra ministers in modi govt](https://www.loksatta.com/wp-content/uploads/2024/06/maharashtra-ministers-in-modi-govt.jpg?w=310&h=174&crop=1)
पियूष गोयल हे भारतीय राजकारणी आहेत. त्यांचा जन्म १३ जून १९६४ रोजी मुंबईत झाला. ते भाजपाचे वरिष्ठ नेते आहेत. पियूष गोयल यांचे वडील वेदप्रकाश गोयल हे सुद्धा भाजपचे ज्येष्ठ नेते, खजिनदार होते तसेच आई चंद्रकांता गोयल या आमदार होत्या. त्यामुळे पियूष गोयल यांच्यावर लहानपणापासूनच राजकीय संस्कार झाले.
३५ वर्षांच्या राजकीय कारकीर्दीत पियूष गोयल यांनी भारतीय जनता पक्षात विविध पदांवर काम केलं आहे. ते भारतीय जनता पक्षाच्या राष्ट्रीय कार्यकारिणीचे सदस्य आहेत. तसेच पक्षाचे कोषाध्यक्ष सुद्धा राहिले आहेत. पेशाने चार्टर्ड अकाऊंटंट असलेल्या पियूष गोयल यांनी देशातील सर्वात मोठ्या राष्ट्रीयीकृत बँक असलेल्या स्टेट बँक ऑफ इंडिया आणि बँक ऑफ बडोदाच्या संचालक मंडळातही काम केले आहे.
पियूष गोयल २०१० मध्ये पहिल्यांदा आणि २०१६ मध्ये दुसऱ्यांदा राज्यसभेवर निवडून गेले. गोयल यांनी कोळसा, ऊर्जा, रेल्वे, वाणिज्य, कॉर्पोरेट अफेअर्स अशा विविध खात्यांचा कार्यभार आतापर्यंत सांभाळलेला आहे. तसेच त्यानी संसदेच्या अर्थ, संरक्षण विषयक विविध समित्यांवरही त्यांनी काम केले आहे.
२०२४ मध्ये भारतीय जनता पक्षाने त्यांना उत्तर मुंबई लोकसभा मतदारसंघातून उमेदवारी दिली होती. या निवडणुकीत त्यांनी साडेतीन लाख मतांच्या फरकाने विजय मिळवला. पियूष गोयल हे विद्यमान नरेंद्र मोदी सरकारमध्ये वाणिज्य आणि उद्योग मंत्रालयाचे मंत्री आहेत.