नवी दिल्लीमध्ये लहानाची मोठी झालेली अभिनेत्री क्रिती सनॉनचा आज वाढदिवस. क्रिती आज २७ वर्षांची झाली. नवी दिल्लीतील न्यू दिल्ली पब्लिक स्कूल आरके पुरम शाळेत क्रितीचे शिक्षण झाले. यानंतर क्रितीने इलेक्ट्रॉनिक्स अॅण्ड कम्युनिकेशनमध्ये बी. टेक केले. वयाच्या पाचव्याच वर्षी क्रितीने मधू सप्रे आणि मिलिंद सोमण यांच्यासोबत रॅम्प वॉक केले होते. मॉडेलिंग करणं हा तिचा फक्त छंद होता. तिला पहिल्यापासून ओढ होती ती बॉलिवूडची. आतापर्यंत क्रितीचे 'हिरोपंती', 'दिलवाले' आणि 'राबता' हे तीन सिनेमे प्रदर्शित झाले आहेत. या तीन सिनेमांमधून तिने आपल्या अभिनयाचा ठसा बॉलिवूडमध्ये उमटवायला सुरूवात केली असे म्हटले तर चुकीचे ठरणार नाही. ऑगस्टमध्ये तिचा 'बरेली की बर्फी' हा चौथा सिनेमाही प्रदर्शित होत आहे. मॉडेलिंगमध्ये काही वर्षे काम केल्यानंतर तिने सायकॉलिजिकल थ्रिलर सिनेमा '१: नेनोक्कदिने' या तेलगू सिनेमातून सिनेसृष्टीत पदार्पण केले. सुपरस्टार महेश बाबूंसोबत तिने या सिनेमात काम केले होते. पण मोठ्या पडद्यावर येण्यापूर्वी क्रितीने अनेक जाहिरातींमध्येही काम केले आहे. क्रितीचे लहानपणीचे फोटो पाहिलेत का? आतापर्यंत तिने विवेल सोप, क्लोज अप, अमुल आईस्क्रिम अशा अनेक ब्रॅण्डसाठी जाहिराती केल्या आहेत. या जाहिरातींमुळे ती खरी प्रकाशझोतात आली. आज तिच्या वाढदिवसादिवशी तिच्या याच काही जुन्या आठवणींना दिलेला उजाळा.. बोल्ड आणि ब्युटीफूल अशा क्रिती सनोनला येणारे वर्ष खूप आनंद आणि यश देऊन जावो, अशाच 'लोकसत्ता ऑनलाइन टीम'कडून शुभेच्छा!