Jasprit Jasbirsingh Bumrah

भारतीय संघाचं प्रमुख अस्त्र. भारतीय संघात बुमराह आहे म्हणजे ४ षटकं वजा करूनच खेळा असं माजी खेळाडू प्रतिस्पर्धी संघांना सांगताना दिसतात. नवा चेंडू असो किंवा मधली षटकं किंवा हाणामारीची- बुमराह येतो आणि विकेट मिळवतो. त्याच्या गोलंदाजीवर धावा करणं जिकिरीचं असतं. आयपीएल स्पर्धेतील मुंबई इंडियन्स संघाचे टॅलेंट स्काऊट आणि भारतीय संघाचे माजी प्रशिक्षक जॉन राईट यांनी बुमराहला हेरलं. त्याची अॅक्शन फलंदाजांना बुचकळ्यात टाकू शकते हे ओळखून त्यांनी संघव्यवस्थापनाला माहिती दिली. लिलावात मुंबई इंडियन्स संघाने बुमराहला ताफ्यात समाविष्ट केलं. तेव्हापासून बुमराह मुंबई इंडियन्स संघाचा आधारवड झाला आहे. दुखापतींमुळे बुमराह तिन्ही प्रकारात सगळे सामने खेळत नाही. वर्कलोड मॅनेजमेंटनुसार त्याला खेळवलं जातं. घोटीव यॉर्कर, प्रतिस्पर्धी फलंदाजाच्या हेल्मेटचा वेध घेणारा उसळता चेंडू, फसवा स्लोअरवन, बुमराहच्या भात्यात असंख्य अस्त्रं आहेत. तो ती परजतो आणि प्रतिस्पर्धी फलंदाजांना नामोहरम करतो. दोन वर्षांपूर्वी भारताने टी२० वर्ल्डकप जिंकला तेव्हा बुमराहला मालिकावीर पुरस्काराने गौरवण्यात आलं होतं. घरच्या मैदानावर संघाला जिंकून देण्यासाठी बुमराह आतूर आहे.