01 September 2016

News Flash

राशीभविष्य

दैनिक साप्ताहिक
a

मेष

मोठा धोका पत्करू नका

एरव्ही अमावास्या ही आपल्यासाठी शुभ फलदायी असते. मात्र या सप्ताहातली अमावास्या ही ग्रहणाने दूषित आहे. त्यामुळे या सप्ताहात आपल्याला ताकसुद्धा फुंकून प्यावे लागणार आहे. नोकरी व्यवसायात काही गोष्टी उलटसुलट होऊ शकतात. अगदी हातातोंडाशी आलेला घास जाऊ शकतो. घाईगडबड अंगाशी येऊ शकते. आहे ती कामे निपटण्यावरच सध्या भर देणे आवश्यक आहे. मोठय़ा लाभाच्या आमिषेने नुकसान संभवते. पूर्ण खात्री केल्याशिवाय कोणाला कामाचा होकार देऊ नका. मोठी गुंतवणूक सध्या स्थगित करा. जुने विकार असलेले, शस्त्रक्रीया झालेले तसेच गर्भवती महिला यांनी या सप्ताहात पुरेशी काळजी घेणे गरजेचे आहे. कौटुंबिक कलहातही एक पाऊल मागे घेणे हिताचे ठरेल.

शुभ दिनांक : २८, ३.

महिलांसाठी : अतिघाई संकटात नेई हे विसरू नका.

डॉ. धुंडिराज पाठक
b

वृषभ

काही दिवस परीक्षेचे

भागीदारी व्यवसाय, कोर्टप्रकरणे, सामाजिक स्तरावरचे अप्रिय प्रसंग अशा माध्यमातून आपणास मनस्तापाचे प्रसंग येऊ शकतात. याबाबत काहीही गृहित धरून चालू नका. नशिबाचा फेरा केव्हाही पलटू शकतो. मात्र शिक्षण, कला, न्याय, साहित्य इ. क्षेत्रातील लोकांना हा सप्ताह चांगले काही देणारा ठरू शकतो. बढतीचे वेध लागतील. वरिष्ठांची नाराजी कमी करता येईल. आर्थिक गणिते चांगली जमतील. वैवाहिक जीवनात काही प्रसंग हे खरेच परीक्षेचे असतील. प्रेमप्रकरणांना वेगळे नकोसे वळण लागू शकते. घरातील ज्येष्ठांची तब्येत वा अन्य काही प्रश्न सगळ्यांचे वेळापत्रक बिघडवू शकतात. मुलांच्या प्रश्नातून निघणारे मार्ग व त्यांचे मिळत जाणारे यश ही सप्ताहातली चांगली जमेची बाजू असणार आहे.

शुभ दिनांक : २९, ३.

महिलांसाठी : अनावश्यक कामात जाणारा वेळ वाचवा.

डॉ. धुंडिराज पाठक
c

मिथुन

सन्मान मिळेल

हितशत्रूंना परस्पर मिळत जाणारी उत्तरे, त्यांचे फसत जाणारे कारनामे, घरातील कोणाच्या आजारावर लागू पडत जाणारे औषध आणि नोकरी व्यवसायात मिळत जाणाऱ्या संधी यातून सप्ताह गाजणारा ठरणार आहे. आपणास मिळणारा एखादा सन्मान हा आपल्या अभिमानाचा विषय राहील. स्वत:च्या क्षमतांचा व बुद्धिमत्तेचा कस लागावा असे प्रसंग येतील आणि त्यात पासही होणार आहात. नोकरी व्यवसायात आपल्या नव्या कल्पनांचे स्वागत होईल. आर्थिक विकासाचे ध्येय गाठले जाईल. भाऊबंदकी आणि प्रवासातल्या अडचणी हे काही मनस्तापाचे विषय होऊ शकतील. वैवाहिक जीवन आनंददायी राहील. घरात कोणाच्या विवाहविषयक बैठकांमध्ये अपेक्षित यश मिळेल. कोणतेही व्यसन वा प्रलोभन मात्र दुसऱ्या कोणत्यातरी टोकाला नेणारे ठरू शकते.

शुभ दिनांक : २८, २९.

महिलांसाठी : प्रवासात पर्स संभाळा.

डॉ. धुंडिराज पाठक
d

कर्क

मोठी शिल्लक पाहाल

अकारण अशी मानसिक घालमेल करवणारा सप्ताह संभवतो. प्रत्यक्ष वस्तुस्थितीचे अवलोकन केल्याशिवाय स्वत:चे मत पक्के करू नका. आर्थिक दृष्टय़ा होणाऱ्या व्यवहारात घाई होणे परवडणार नाही. कोणालाही अविवेकी शब्द देऊन फसू नका. नवे काही मिळाले नाही तरी चालेल पण ‘चालू व्यवहारात चुकीचे निर्णय झाल्याने गोंधळ झाला’ असा पश्चात्ताप नंतर होणार नाही अशी काळजी घ्या. विचारपूर्वक केलेल्या व्यवहारात मोठी शिल्लक पाहायला मिळेल. साहित्य वर्तुळातून मिळणारा प्रतिसाद उत्साहवर्धक असेल. नवे लिखाण व नवे विचार आपणास यशाच्या उंचीवर नेणारे ठरतील. घरगुती वातावरण मात्र सध्या मनासारखे नाही. सगळ्यांच्या अपेक्षा पूर्ण करताना मोठी धावपळ होणार आहे. स्वत:च्या आरोग्याकडे चुकूनही दुर्लक्ष करू नका.

शुभ दिनांक : २९, ३.

महिलांसाठी : लक्षात ठेवा, बाहेरचे जग हे व्यवहारांवर चालते, भावनांवर नाही.

डॉ. धुंडिराज पाठक
e

सिंह

जपूनच राहा

अजब असा नियतीचा न्याय पहायला मिळेल. ठरवणार एक, करावे लागणार दुसरेच. जावे एका दिशेने तर पोहोचणार भलतीकडेच. सध्या आपली फसगत पहायला काही जण टपून बसले आहेत हे विसरू नका. राजकारण, सामाजिक उपक्रम वा काही महत्त्वाचे असे व्यावसायिक निर्णय यात छोटीशी चूकही खूप काही किंमत मोजायला लावील. पिठोरी अमावास्या त्या मानाने जास्त संवेदनशील ठरू शकते. अपघात, घातपात, तीव्र मतभेद वा टोकाची भांडणे यांच्या जागा आधीच अभ्यासून शक्य ती उपाययोजना करा. कामाचे गणित व वेळापत्रक बिघडणार हे गृहीत धरून तसे नियोजन लवचीक ठेवा. फार मोठे धाडस या सप्ताहात आत्मघातकी ठरू शकते. घरातही कोणाला उगाच संशयाच्या पिंजऱ्यात उभे करू नका. जरा जपूनच रहा. राजकारणाचे बळी पडू नका.

शुभ दिनांक : २८, ३.

महिलांसाठी : सगळ्याच गोष्टी मनासारख्या व्हाव्यात हा अट्टहास नको.

डॉ. धुंडिराज पाठक
f

कन्या

संधी सोडू नका

साहित्य, संगीत, कला, शिक्षण, व्यवसाय अशा अनेक क्षेत्रांतला आपला वावर हा लीलया राहील. नवे साहित्य वाचकांच्या पसंतीला उतरेल. नोकरदारांना अनेक चांगल्या संधी मिळतील. स्वत:ला सिद्ध करण्याची एकही संधी सोडू नका. हॉटेल, सोनेचांदीचे व्यापारी, पारंपरिक व्यवसायात असणारे तसेच शेअरमार्केटमध्ये काम करणारे यांना हा सप्ताह आर्थिक दृष्टय़ा चांगला जाईल. वाहतूक व दळणवळण व्यवसायात असणाऱ्यांनी मात्र फार सतर्क राहणे गरजेचे.  सरकारी ससेमिरा व अपघात यांच्यापासून वाचण्यासाठी शक्य ते सर्व प्रयत्न करा. कायदेशीर मार्ग सोडू नका. प्रवासात पुरेशी काळजी घ्या. एकीकडे उत्तुंग यश तर दुसरीकडे अशा काही अडचणी यातून मार्ग काढायचा आहे. घरगुती आघाडीही अशाच काही गैरसमजातून जायला लावणारी ठरेल.

शुभ दिनांक : २९, ३.

महिलांसाठी : विचारपूर्वक पण नेमकेपणाने निर्णय घेणे आवश्यक.

डॉ. धुंडिराज पाठक
g

तूळ

आर्थिक आघाडीवर जपा

सप्ताहात आर्थिक आघाडी जास्त विचारपूर्वक संभाळायची आहे. माणसांची पारख व व्यावसायिक अंदाज चुकणार नाही याची काळजी घ्या. उधारी वसुलीसाठी नको ते मार्ग अवलंबू नका. आर्थिक स्तरावर नवे ते मिळविण्याच्या नादात आहे ते गमावणार नाही याची काळजी घ्या. स्वत:बद्दल होऊ शकणारे गैरसमज वेळीच थांबवा. संगत कोणाची करतो आहोत, हेही पुन:पुन्हा तपासा. नवे व्यवहार, नवा व्यापार व नवे ग्राहक यांना सध्या फार महत्त्व देऊ नका. प्रवास, पत्रव्यवहार व भेटीगाठी यातून मार्ग मिळत राहील. बँकप्रकरणात अपेक्षित निर्णय घेता येतील. घरगुती आघाडी मात्र शांतता व समाधान देईल अशा अपेक्षा न ठेवलेल्याच बऱ्या. संततीच्या प्रश्नातली गुंतागुंत वाढणे शक्य. गरोदर महिला, आजारी व अशक्त लोकांनी मर्यादेत राहिलेलेच बरे.

शुभ दिनांक : २८, २९.

महिलांसाठी : विचारांची पातळी चुकूनही सोडू नका.

डॉ. धुंडिराज पाठक
h

वृश्‍चिक

चांगल्यांचा उपयोग

ग्रहणयुक्त अमावास्या असताना साडेसातीला बळ मिळत असते. या सप्ताहातली पिठोरी अमावास्या ही अशी आहे. सरकारी कामे वेळेत करा. कायदा मोडायचा विचार करू नका. सरकारी अधिकाऱ्यांशी वितुष्ट घेऊ नका.

सरळमार्गी होणाऱ्या आर्थिक व्यवहारांना प्राधान्य द्या. काही चांगली माणसे आपल्या आयुष्यात येतील. त्यांचा उपयोग करून घ्या. विचारवंत, हितचिंतक व नि:स्वार्थी लोकांचा उपयोग घेण्यास हा सप्ताह उत्तम आहे. त्यांच्या सल्ल्याने व ओळखीने पैशाची काही कामे चांगली मार्गी लागतील. अपघात व मतभेदांचा काळ अजून संपलेला नाही. वादविवादात वेळ घालविण्यापेक्षा निवांत बसून मन शांत करणे परवडेल. आजाराच्या बाबतीत जाणकार तज्ज्ञाचा सल्ला फार उपयुक्त ठरणार आहे, तो टाळू नका.

शुभ दिनांक : २९, ३.

महिलांसाठी : खुन्नस किंवा सूड म्हणून काहीही करू नका.

डॉ. धुंडिराज पाठक
i

धनु

प्रगतीच्या संधी मिळतील

सामाजिक व्यासपीठवरचा वावर, राजकारणाच्या आखाडय़ातील डावपेच, सार्वजनिक न्यासांच्या कामकाजातील निर्णय व घरगुती उपक्रमातील प्रतिक्रिया याबाबत फार सतर्क राहणे गरजेचे आहे. ‘मनात एक होते पण झाले भलतेच’ असे म्हणायची वेळ येऊ देऊ नका. ही काळजी घेतल्यास सप्ताह अनेक बाबतीत चांगले यश देणारा ठरू शकतो. ज्येष्ठ व अनुभवी लोकांचा सल्ला उपयुक्त ठरेल. सकारात्मक विचारसरणीचा फायदा होईल.

आर्थिक यश अपेक्षित असे राहील. व्यापाराचे नवे क्षितिज गाठू शकाल. नोकरदारांनाही प्रगतीच्या संधी मिळतील. शिक्षण क्षेत्रात असणाऱ्यांनी मात्र जरा सबुरीनेच वागावे. विवाहेच्छूंसाठी चांगले प्रस्ताव येतील. बेकारांना तणावग्रस्ततेतून बाहेर पडता येईल. वैवाहिक व कौटुंबिक जीवनात चांगला सलोखा राहील.

शुभ दिनांक : २८, ३.

महिलांसाठी : आपल्या निर्णयाला चांगला प्रतिसाद मिळेल.

डॉ. धुंडिराज पाठक
j

मकर

नशीब साथ देईल

आरोग्य हे जाणीवपूर्वक संभाळावे लागते तसेच पथ्य व औषधे या दोन्हीचा अवलंब करावा लागतो हे या सप्ताहात आपणास आवर्जून सांगावे लागेल. कारणही तसेच आहे. नशिबाची साथ या सप्ताहात आपल्याला चांगली मिळणार आहे. थोरामोठय़ांशी छान सूत जमणार आहे. वरिष्ठांची मर्जी संपादन करणे नोकरदारांना सहज जमणार आहे.

काही अपेक्षित व्यवहार मनासारखे घडणार आहेत. आर्थिक दृष्टय़ा समाधानकारक स्थिती गाठता येणार आहे. पण त्याचमुळे आपला कष्टाळू स्वभाव उचल खाणार आहे. कुठे थांबायचे हे लक्षात यायला झालेला उशीर काही आजारपण घेऊन येऊ शकतो. जुने विकार असणाऱ्यांनी जास्त सतर्क राहणे गरजेचे. वैवाहिक जोडीदाराची तब्येतही दुर्लक्षित करून चालणार नाही. मुलांच्या प्रगतीच्या बातम्या उत्साहवर्धक असतील.

शुभ दिनांक : २९, ३.

महिलांसाठी : आपले व परके यांच्यातला फरक वेळीच ओळखू येणे गरजेचे ठरेल.

डॉ. धुंडिराज पाठक
k

कुंभ

वेळीच सावध व्हा

अवास्तव कल्पना, अतिरंजित आत्मस्तुती व अविवेकी वागणे यातून भलत्याच वळणावर जाऊन पोहोचणे शक्य. मूळचा आपला स्वभाव असा नाही, पण सप्ताहात असे वाहावत जाणे शक्य आहे. वेळीच सावध व्हा. कोणतेही धाडस सध्या परवडणारे नाही. आहे तो व्यवसाय व नोकरीतली आहे ती स्थिती संभाळण्यावर भर द्या.

मोठी गुंतवणूक, दूरचे प्रवास व अतिवरिष्ठांची भेट यात सावधानता बाळगा. तोंडी व्यवहारांपेक्षा लेखी व कायदेशीर व्यवहारांनाच प्राधान्य द्या. उधारीवसुलीतून आर्थिक ध्येय गाठता येणे शक्य. शक्यतो कोठे मध्यस्थी करायला जाऊ नका. विचारल्याशिवाय सल्ला देणे व मतप्रदर्शन करणे टाळा. वैवाहिक जोडीदाराची मते अगदीच धुडकाऊन लाऊ नका. त्यांच्या तब्येतीची आवश्यक ती काळजी घेणे गरजेचे.

शुभ दिनांक : २८, २९.

महिलांसाठी : आपलेच विचार सगळ्यांना पटतील असे नाही. मतभेदांचाही आदर राखा.

डॉ. धुंडिराज पाठक
l

मीन

क्षमतांचा पूर्ण वापर करा

श्वशन मार्गाचे विकार, हृदयविकार वा त्वचाविकार असणाऱ्यांनी या सप्ताहात काळजी घेणे गरजेचे ठरावे. ही काळजी घेतल्यास सप्ताह आपणास काही बाबतीत अनपेक्षित यश देणारा ठरू शकतो. जोडीदाराची मदत, सहकाऱ्यांचे सहकार्य, वरिष्ठांचा पाठिंबा व थोरामोठय़ांचे आशीर्वाद या शिदोरीवर वेगाने पुढे जाता येईल.

कोर्ट प्रकरणात अपेक्षित वळण मिळेल. स्वत:च्या क्षमतांचा पुरेपूर वापर करून घेता येईल. कामाचे गणित छान जमेल. मिळणाऱ्या संधीचे सोने करता येईल. कंटाळा, चालढकल व वेळकाढूपणा आवर्जून टाळा. नोकरदारांना बढतीसाठी व अपेक्षित ठिकाणासाठी केलेले बदलीचे प्रयत्न सफल ठरतील. वैवाहिक जीवनात आनंद राहील. कौटुंबिक आघाडीही उत्साहवर्धक असेल. घरात कोणाच्या विवाह वा नोकरीच्या प्रयत्नात यश मिळवू शकाल.

शुभ दिनांक : २९, ३.

महिलांसाठी : केवळ विचार करीत बसू नका, कृतीला प्राधान्य द्या.

डॉ. धुंडिराज पाठक