प्रवासात मृत्यूमुखी पडलेल्या आपल्या पतीच्या मृतदेहासोबत महिलेला जबरदस्ती खाली उतरवण्यात आल्याची धक्कादायक घटना समोर आली आहे. उत्तर प्रदेशात ही घटना घडली आहे. कंडक्टरने अर्ध्या प्रवासात महिलेला खाली उतरवलं. हे दांपत्य बहारिच येथून लखनऊला प्रवास करत होते. आपल्या नातेवाईकांना भेटण्यासाठी ते चालले होते. यावेळी अचानक व्यक्तीची तब्बेत बिघडली आणि अचानक त्यांचा मृत्यू झाला. महिलेने केलेल्या आरोपानुसार, बाराबंकी येथील रामनगर क्रॉसिंगजवळ आपल्याला जबरदस्ती उतरवण्यात आलं आणि मृतदेह घेऊन जाण्यास सांगण्यात आलं. बसच्या कंडक्टरने जबरदस्ती महिलेला खाली उतरवलं. इतकंच नाही तर प्रवासाचा कोणताही पुरावा तिच्याकडे नसावा यासाठी तिकीटही काढून घेतलं. यावेळी तिथे उपस्थित काही लोकांनी बसचा नंबर नोंद करुन घेतला. "मला आधी यासंबंधी काही माहिती नव्हती, पण आता माहिती मिळाली आहे. आम्ही या प्रकरणाची चौकशी करु आणि संबंधित ड्रायव्हर आणि कंडक्टरवर कारवाई करु", असं बाराबंकी डेपोचे प्रमुख मनोज कुमार यांनी दिली आहे.
