Telangana Vidhan Sabha Election Result 2023 Updates, 3 December 2023: सध्या देशभरात चर्चा आहे ती पाच राज्यांमधील विधानसभा निवडणुकांच्या निकालांची. राजस्धान, मध्य प्रदेश, छत्तीसगड, तेलंगणा या राज्यांमध्ये आज मतमोजणी होत असून मिझोरममध्ये सोमवारी मतमोजणी होणार आहे. राजस्थान, मध्य प्रदेश व छत्तीसगडमध्ये काँग्रेस व भाजपामध्ये थेट लढत दिसत असताना तेलंगणामध्ये मात्र काँग्रेसला स्पष्ट बहुमत मिळत असल्याचा अंदाज एग्झिट पोल्सच्या माध्यमातून वर्तवण्यात आला होता. मतमोजणीच्या पहिल्या काही तासांमध्ये हा कौल अधिकाधिक स्पष्ट होऊ लागताच तेलंगणामधील राजकीय हालचाली वाढल्या आहेत.
काँग्रेस सर्व संभाव्य शक्यतांसाठी सज्ज!
तेलंगणामध्ये काँग्रेसला बहुमत मिळत असल्याचे प्रारंभिक कौल येताच काँग्रेस सतर्क झाली आहे. हैदराबादमध्ये काही लग्झरी बसेस तयार ठेवण्यात आल्या आहेत. तसेच, सर्व विजयी आमदारांना लगेच हॉटेलमध्ये हलवण्यात येणार असल्याचं सांगितलं जात आहे. यासंदर्भात काँग्रेसचे नेते स्पष्ट बहुमत असल्यामुळे आम्हाला चिंता वाटण्याचं कारण नाही, अशी भूमिका मांडत असले, तरीही कोणताही धोका पत्करण्यासाठी काँग्रेस नेतेमंडळी तयार नसल्याचं त्यांच्या प्रतिक्रियांवरून दिसून येत आहे.
“केसीआर यांची पद्धत सगळ्यांनाच माहिती आहे”
आमदारांना गळाला लावण्याची केसीआर यांची पद्धत असल्याचा दावा काँग्रेसकडून करण्यात आला आहे.
“आपल्या सगळ्यांनाच केसीआर यांची कामाची पद्धत माहिती आहे. आमदारांना पळवणं हीच त्यांची पद्धत आहे. त्यामुळे आम्ही काही सतर्कतेचे उपाय करून ठेवले आहेत. पण आजचे कौल पाहाता आम्हाला काळजी करण्याची गरज नाही असं दिसतंय. कारण आम्ही किमान ८० जागांवर विजयी होत आहोत. सर्वकाही ठीक आहे”, अशी प्रतिक्रिया तेलंगणा काँग्रेस प्रदेश उपाध्यक्ष किरण कुमार यांनी दिली आहे.
खरंच आमदारांना हलवलं जाणार आहे का?
दरम्यान, तेलंगणातील विजयी आमदारांना खरंच हॉटेलमध्ये किंवा इतर ठिकाणी हलवलं जाणार आहे का? असा प्रश्न पत्रकारांनी विचारताच कर्नाटकमधील काँग्रेसचे मंत्री रहीम खान यांनी सूचक प्रतिक्रिया दिली. “जर तशीच वेळ आली, तर हाय कमांड त्यावर निर्णय घेईल”, असं ते म्हणाले.
दरम्यान, हैदराबादमधील ताज कृष्णा परिसरात बसेस तयार ठेवण्यात आल्या असून सर्व विजयी आमदारांना बंगळुरूमध्ये हलवण्यात येणार असल्याचं सांगितलं जात आहे.
