महाराष्ट्र अंधश्रद्धा निर्मूलन समितीचे संस्थापक डॉ.नरेंद्र दाभोलकर यांच्या स्मृती निमित्त सातारा नगर पालिकेतर्फे दिला जाणारा तिसरा डॉ.नरेंद्र दाभोलकर स्मृती सामाजिक पुरस्कार प्रख्यात खगोलशास्त्रज्ञ डॉ.जयंत नारळीकर आणि त्यांच्या पत्नी मंगला नारळीकर यांना जाहीर करण्यात आला. पुरस्कार वितरण दि.१३ डिसेंबर रोजी, शाहू कला मंदिरात होणार आहे. एक लाख रुपये रोख, सन्मान चिन्ह, शाल असे या पुरस्काराचे स्वरूप असल्याचे नगराध्यक्ष विजय बडेकर यांनी सांगितले. बडेकर म्हणाले, रविवारी सायंकाळी ६ वाजता होणाऱ्या या समारंभात पुरस्काराचे वितरण जेष्ठ शास्त्रज्ञ डॉ. दत्तप्रसाद दाभोलकर यांच्या हस्ते होणार आहे. गेल्या चार दशकांपासून त्यांचे अंतरिक्ष संशोधन, साहित्य सेवेचे कार्य सुरू आहे. या कार्यात मंगलाताई नारळीकर यांनी त्यांना मदत केली आहे. तसेच ‘पाहिलेले देश भेटलेली माणसे’ हे त्यांचे स्वतंत्र पुस्तक आहे.
