ठाण्याहून मुंबईकडे येणाऱ्या लोकलच्या महिलांच्या डब्यात अर्धनग्न आणि बेशुद्धावस्थेत एक महिला आढळल्यानंतर गाडीत एकच गोंधळ उडाला. महिलांनी साखळी खेचत ही गाडी मुलुंडला थांबवली. अखेर लोहमार्ग पोलीस, रेल्वे सुरक्षा दल आणि रेल्वे कर्मचारी यांनी धाव घेत या महिलेला कपडे पुरवत तिच्या विनंतीनुसार तिची रवानगी कल्याणकडे केली. मात्र, या प्रकरणाची कोणतीही नोंद अथवा बेशुद्धावस्थेत असलेल्या महिलेची वैद्यकीय तपासणी करण्याची दखल यापैकी एकाही यंत्रणेने घेतली नाही. ठाण्याहून सकाळी ८.२५च्या सुमारास निघालेल्या लोकलच्या महिलांच्या डब्यात साधारण ६० वर्षांची एक महिला अर्धनग्न आणि बेशुद्धावस्थेत आढळली. त्यानंतर गाडी थांबवण्यात आली. महिला शुद्धीवर आल्यानंतर तिच्या विनंतीवरून तिला कल्याण लोकलमध्ये बसवून देण्यात आले.
