चित्रतपस्वी भालजी पेंढारकर यांचे चिरंजीव चित्रपट निर्माते, राष्ट्रीय स्वयंसेवक संघाचे कार्यकर्ते सदानंद पेंढारकर यांचे रविवारी दुपारी हृदयविकाराच्या तीव्र झटक्याने निधन झाले. ते ७६ वर्षांचे होते. सोमवारी सकाळी ९ वाजता पंचगंगा मुक्तिधाममध्ये अंत्यविधी करण्यात येणार आहे.सदानंद पेंढारकर हे भालजी पेंढारकर व लीलाबाई पेंढारकर यांचे चिरंजीव होत. ‘सख्या-साजणा’सारख्या चित्रपटाचे ते निर्माते होते. प्रभाकर पेंढारकर, माधवी देसाई यांच्यापाठोपाठ सदानंद पेंढारकर यांचेही निधन झाल्याने पेंढारकर कुटुंबीयांसाठी हा आणखी एक धक्का आहे. सदानंद पेंढारकर यांच्या मागे पत्नी, मुली, जावई, नातवंडे असा परिवार आहे.
