ईव्हीएम मशील हॅक करून दाखवण्याच्या निवडणूक आयोगाच्या आव्हानावर शुक्रवारी फक्त आठ राजकीय पक्षांनी आपलं उत्तर दिलं आहे. निवडणूक आयोगाने आव्हान स्वीकारण्यासाठी शुक्रवारी सायंकाळी पाच वाजेपर्यंतचा वेळ दिला होता. प्रत्युत्तरात फक्त शरद पवार यांच्या राष्ट्रवादी काँग्रेस पक्षानेच निवडणूक आयोगाचे आव्हान स्विकारले आहे. तर ईव्हीएम मशीनमध्ये गडबड असल्याची ओरड केलेल्या आम आदमी पक्षाने मात्र यावेळी हात वर केले. खरंतर ईव्हीएम मशीनमध्ये फेरफार करून भाजपने निवडणूका जिंकल्याचा आरोप करण्यात आप आणि काँग्रेसचा पुढाकार होता. पण निवडणूक आयोगाने दिलेल्या आव्हानात या दोन्ही पक्षांनी यात सहभागी होणं टाळलं आहे. राष्ट्रवादी पक्षाने ईव्हीएम मशीन हॅक करण्याच्या आव्हानासाठी आपले तीन प्रतिनिधी नियुक्त केल्याचं निडवणूक आयोगाने सांगितलं आहे. या आव्हानात पंजाब, उत्तरप्रदेश आणि उत्तराखंड येथून ईव्हीएम मशीन मागविल्या जाणार आहेत. 'आप'ने निवडणूक आयोगाचं हे आव्हान एक नाटक असल्याचं सांगत यात आम्ही सहभागी होणार नाही, असं जाहीर केलं आहे. याशिवाय, कोणतेही नियम न लादता स्वतंत्रपणे ईव्हीएम मशीन हॅक करून दाखवण्याच्या आश्वासनापासून निवडणूक आयोग मागे का हटत आहे? असा सवालही आम आदमी उपस्थित केला आहे. ''निवडणूक आयोगाचं हे आव्हान नसून एक नाटक आहे. या नाटकात आम्हाल भाग घ्यायचा नाही.'', असे आपचे नेते गोपान राय यांनी सांगितले. दिल्ली सरकारचे मंत्री सौरव भारद्वाज यांनी थेट विधानसभेत प्रात्यक्षित दाखवत ईव्हीएम मशीन कसं हॅक करता येऊ शकतं याचा दावा केला होता. त्यावर निवडणूक आयोगाने ईव्हीएम मशीन हॅक करणं कोणत्याही परिस्थितीत अशक्य असल्याचं ठामपणे सांगितलं होतं.