पीटीआय, पेशावर : अफगाणिस्तानला लागून असलेल्या पाकिस्तानच्या अशांत खैबर पख्तुन्ख्वा प्रांतात एका कट्टरवादी इस्लामी राजकीय पक्षाच्या सभेत एका आत्मघातकी हल्लेखोराने रविवारी घडवून आणलेल्या शक्तिशाली स्फोटात किमान ४० जण ठार, तर दोनशेहून अधिक लोक जखमी झाले. बजाऊर आदिवासी जिल्ह्याची राजधानी असलेल्या खार येथे जमियत उलेमा-इ-इस्लाम-फझल (जेयूआय-एफ) पक्षाच्या कार्यकर्त्यांच्या संमेलनात दुपारी ४ वाजता हा स्फोट झाला. जखमींना रुग्णालयात हलवण्यासाठी रुग्णवाहिका येऊन पोहचल्यानंतर, घाबरलेले लोक स्फोटस्थळी गोळा होत असल्याचे दूरचित्रवाहिनीवरील दृश्यांत दिसून आले. स्फोट झाला, त्यावेळी पाचशेहून अधिक लोक संमेलनात सहभागी झाले होते. हा आत्मघातकी स्फोट असल्याचे प्राथमिक तपासात आढळल्याचे मालकंद रेंजचे पोलीस उपमहानिरीक्षक मेहमूद सत्ती यांनी सांगितले. तथापि, स्फोटाचे स्वरूप निश्चित करण्यासाठी पुरावा गोळा करण्यात येत आहे. या संपूर्ण भागात शोधमोहीम हाती घेण्यात आली आहे, असे ते म्हणाले. अद्याप कोणत्याही गटाने या हल्ल्याची जबाबदारी स्वीकारलेली नाही. या घटनेचा तपास करावा, अशी मागणी जेयूआय-एफ चे प्रमुख फझलुर रहमान यांनी पंतप्रधान शाहबाज शरीफ आणि प्रांताचे काळजीवाहू मुख्यमंत्री आझम खान यांच्याकडे केली आहे.
