जागतिक कुस्ती स्पर्धातील कामगिरीमुळे ‘दि ग्रेट खली’ नावाने ओळखला जाणारा दलीप सिंह राणा याने गुरुवारी भाजपमध्ये प्रवेश केला. पंतप्रधान नरेंद्र मोदी हे देशाच्या विकासासाठी करत असलेल्या कामामुळे आपण प्रभावित झालो असल्याचे त्याने सांगितले. पंजाब पोलिसांचा माजी अधिकारी असलेल्या खली याने केंद्रीय मंत्री जितेंद्र सिंह व भाजपचे सरचिटणीस अरुण सिंह यांच्या उपस्थितीत भाजप मुख्यालयात पक्षप्रवेश केला. योगायोग म्हणजे, आता रद्द करण्यात आलेल्या तीन शेती कायद्यांविरुद्ध वर्षभर चाललेल्या शेतकरी आंदोलनाला खली याने पाठिंबा जाहीर केला होता. खली हे राष्ट्रीय विचारसरणीचे असून, ते कुठेही राहिले तरी त्यांचे मन भारतातच होते, असे जितेंद्र सिंह यावेळी म्हणाले.
