श्रीरामपूर : बँक ऑफ बडोदाच्या रोखपालाने तब्बल दहा लाख रुपयांचा नोटा जाळून टाकण्याचा प्रकार उघडकीस आला आहे. नोटा जाळल्यानंतर शॉर्ट शॉर्टसर्किने आग लागल्याचा बहाणा त्याने केला. नेवासे तालुक्यातील सलाबतपूर येथे ही घटना घडली आहे. बँक ऑफ बडोदाच्या नेवासा तालुक्यातील सलाबतपूर शाखेत दि. २५ सप्टेंबर रोजी ही घटना घडली होती. मात्र तब्बल एक महिन्यानंतर नेवासे पोलीस ठाण्यात याप्रकरणी गुन्हा नोंदविण्यात आला आहे. त्यामुळे या प्रकरणातील गुंतागुंत वाढली आहे. या प्रकरणी बँकेतील रोखपाल रमेश बाजीराव वाघ (रा. साईसिटी, नेवासा फाटा, नेवासा) याच्याविरुद्ध गुन्हा दाखल करण्यात आला आहे. याबाबत अमोल बद्रिनाथ सोनवणे (रा. नवीन चांदगाव, ता. नेवासा) यांनी दिलेल्या फिर्यादीत म्हटले आहे की, वाघ हा बँक ऑफ बडोदाच्या सलाबतपूर शाखेत रोखपाल म्हणून काम करतो. त्याने बँकेतील १० लाख १२ हजार ४३५ रुपयांच्या भारतीय चलनातील नोटा स्वत: जाळून टाकल्या. परंतु, त्या नोटा शॉर्टसर्किट होऊन जळून गेल्याचा बहाणा केला. बँकेचे नुकसान करण्याच्या हेतूने रोखपालाने हा प्रकार केला. नेवासा पोलिस ठाण्यात रोखपाल रमेश वाघ याच्याविरुद्ध गुन्हा दाखल करण्यात आला आहे. पुढील तपास पोलिस उपनिरीक्षक भिंगारे हे करीत आहेत.
