परभणी - आंतरजातीय प्रियकराशी विवाह करणाऱ्या मुलीचा गळा दाबून खून करण्यात आला. ही घटना पालम तालुक्यातील नाव्हा येथे २१ ते २२ एप्रिल दरम्यान घडली. तब्बल दहा ते बारा दिवसानंतर हा प्रकार उघडकीस आला. याप्रकरणी मृत मुलीचे वडील बालासाहेब भीमराव बाबर, आई रुखमीनबाई बालासाहेब बाबर, अच्यूत दत्तराव बाबर, राजेभाऊ रखमाजी बाबर, अशोक रूस्तूमराव बाबर, आबासाहेब रूस्तूमराव बाबर, गंगाधर योगाजी बाबर, गोपाळ अशोक बाबर यांच्याविरूद्ध शुक्रवारी पालम पोलीस ठाण्यात गुन्हा दाखल करण्यात आला. हेही वाचा >>> सोलापुरात कचरा आगारापाठोपाठ स्मार्ट सिटीच्या पाईप साठ्यालाही मोठी आग नाव्हा येथील १९ वर्षीय मुलीचे गावातील एका तरुणासोबत प्रेम होते. पण मुलीचा प्रियकर आंतरजातीय असल्याने त्याच्याशी विवाह करू नये असा दबाव टाकत मुलींच्या आई वडिलांनी विरोध केला. तरीही मुलगी प्रियकरासोबत आंतरजातीय विवाह करण्यावर ठाम होती. त्यामुळे घरात झोपलेल्या मुलीची २१ एप्रिल रोजी रात्री गळा दाबून हत्या करण्यात आली. त्यानंतर कोणालाही थांगपत्ता लागणार नाही, यासाठी रात्री भावकीतील निवडक लोकांच्या उपस्थितीत मृत मुलीचे प्रेत जाळून टाकत पुरावा नष्ट करण्यात आला . या अंत्यविधीला उपस्थित असणाऱ्या लोकांना घटनेची माहिती होती. तरीही पोलिसांना या घटनेची कल्पना देण्याचे जाणीवपूर्वक टाळले आणि अपराधास सहाय्य केल्याप्रकरणी वरील आरोपींविरुद्ध गुन्हा दाखल करण्यात आला. तपास उपविभागीय पोलिस अधिकारी समाधान पाटील करीत आहेत. तपासासाठी न्यायवैद्यक शास्त्र विभाग, स्थानिक गुन्हे शाखेचे पथक, पालम पोलिसांचे पथके घटनास्थळी असल्याची माहिती पोलीस सूत्रांनी दिली.
