वसई पूर्वेतील वसंतनगरी येथील दिवाण मार्केटला भीषण आग लागल्याची घटना घडली आहे. आज (बुधवार) रात्री साडेआठच्या सुमारास ही घटना घडली. या आगीत मार्केट मधील दुकानांचे मोठ्या प्रमाणात नुकसान झाले आहे. वसई पूर्वेतील वसंत नगरी परिसरात दिवाण मार्केट आहे. या दिवाण मार्केटमध्ये मासळी विक्रेते, भाजीपाला विक्रेते , कपडे व इतर विविध प्रकारच्या वस्तूंची दुकाने आहेत. दरम्यान रात्री साडेआठ वाजेच्या सुमारास अचानक या मार्केटला आग लागल्याने खळबळ उडाली. या घटनेची नागरिकांनी तातडीने अग्निशमन दलाला माहिती दिली. त्यानुसार अग्निशमन दलाचे जवान घटनास्थळी दाखल होऊन आगीवर नियंत्रण मिळविण्याचे काम सुरू झाले. शॉर्टसर्किटने ही आग लागली असल्याचा संशय व्यक्त करण्यात येत असून, या आगीत दुकानदारांचे लाखोंच्या मालाचे नुकसान झाले आहे. आगीची तीव्रता अधिक असल्याने बघ्यांची मोठी गर्दी झाली होती.
