साकीनाका येथे शुक्रवारी एका विवाहितेने गळफास लावून आत्महत्या केली होती. या प्रकरणी तिच्या पतीने दिलेल्या तक्रारीवरून साकीनाका पोलिसांनी भूषण लहाने या तरुणाला अटक केली आहे. भूषण हा निवृत्त साहाय्यक पोलीस आयुक्त भगवान लहाने यांचा मुलगा आहे. पीडित महिला ३५ वर्षांची असून तिला दहा वर्षांचा मुलगा आहे. शुक्रवारी तिने आपल्या राहत्या घरात गळफास लावून आत्महत्या केली होती. माझ्या पत्नीच्या आत्महत्येस भूषण लहाने जबाबदार असल्याचा आरोप तिच्या पतीने केला होता. पोलिसांनी या प्रकरणी चौकशी केल्यानंतर भूषण आणि तिची मैत्री असल्याचे स्पष्ट झाले होते. तसेच दोघांच्या मोबाइलची तपासणी केली असता दोघे एकमेकांच्या संपर्कात असल्याचे स्पष्ट झाले होते. या प्रकरणी आम्ही भूषण याला अटक केल्याची माहिती साकीनाका पोलीस ठाण्याचे वरिष्ठ पोलीस निरीक्षक अविनाश धर्माधिकारी यांनी दिली.
