गेल्या आठवड्याभरापासून या जोडप्याच्या फोटोनं सोशल मीडियावर नुसता कल्ला केलाय. हे जोडपे सर्वांच्या मस्करीचा विषय बनले होते. काही फेसबुक पेजनी तयार केलेले या जोडप्याचे मीम सोशल मीडियावर तुफान व्हायरल झाले. ज्यांची एवढ्या मोठ्या प्रमाणात खिल्ली उडवली जात आहे ते नक्की आहेत तरी कोण? असा प्रश्न तुम्हालाही पडला असेल. तर हे आहे कॉलीवूडमधलं प्रसिद्ध जोडपं एटली कुमार आणि कृष्णा प्रिया. एटली कुमार हा दिग्दर्शक आणि पटकथा लेखक आहे. तर कृष्णा प्रिया ही प्रसिद्ध टीव्ही कलाकार आहे. प्रियाचं सुंदर दिसणं आणि एटलीचा रंग या दोन कारणांमुळे या दोघांची अनेकांनी सोशल मीडियावर खिल्ली उडवली. गेल्या आठ वर्षांपासून ते लिव्ह-इन रिलेशनशिपमध्ये होते. २००६ साली प्रिया एका मालिकेत काम करत होती. याच मालिकेत एटलीचा मित्र देखील काम करायचा. त्यानेच प्रिया आणि एटलीची भेट घालून दिली होती. आठ वर्षांच्या रिलेशनशिपनंतर २०१४ मध्ये या दोघांनी लग्न केले. 'राजा राणी' हा एटलीचा पहिला चित्रपट होता. २०१३ मध्ये प्रदर्शित झालेला हा चित्रपट खूपच गाजला होता. कोट्यवधीचा गल्ला या चित्रपटाने जमवला होता. त्यानंतर एटलीनं दिग्दर्शित केलेले इतर तीन चित्रपट देखील तुफान गाजले. पण दुर्दैवानं एटलीच्या कामापेक्षा लोकांनी त्याच्या रंगाला महत्त्व देऊन सोशल मीडियावर त्याला ट्रोल केलं.