पेट्रोल-डिझेलचे दर सर्वसामान्यांच्या आवाक्याबाहेर गेल्याने इलेक्ट्रिक वाहने खरेदीकडे ग्राहकांचा कल वाढला आहे. यामुळे कारच नव्हे तर अनेक कंपनीच्या बाईकही आता इलेक्ट्रिक अवतारात येत आहेत. इलेक्ट्रिक वाहनांसाठीही भारत एक मोठी बाजारपेठ म्हणून उदयास येत आहे. दुचाकी बाजारात आता इलेक्ट्रिक वाहनांसाठी अनेक पर्याय उपलब्ध आहेत. अनेक स्कूटर आणि बाइक्स इलेक्ट्रिक अवतारात दिसणार आहेत. होंडा अ‍ॅक्टिव्हाच्या इलेक्ट्रिक व्हेरियंटला बऱ्याच दिवसांपासून मागणी होती. काही काळापूर्वी ते सुरू करण्याचीही चर्चा होती. पण आता कंपनी आधी इलेक्ट्रिक बाईकचा विचार करत असल्याची माहिती आहे. Honda आगामी काळात भारतीय ऑटोमोबाईल बाजारात इलेक्ट्रिक बाईक लाँच करणार असल्याची माहिती आहे. मिळालेल्या माहितीनुसार, होंडा २०२४ मध्ये आपली एक बाईक भारतीय बाजारात सादर करणार असल्याची माहिती आहे. यानंतर ते जपान आणि युरोपमध्येही लाँच केले जाईल. या मोटारसायकलमध्ये अनेक वैशिष्ट्ये देखील असतील ज्यामुळे ती पूर्णपणे वेगळी असेल. (हे ही वाचा : ‘या’ कंपनीची कार खरेदी करण्यासाठी ग्राहकांची शोरुम्सवर तुफान गर्दी; ३० दिवसात विकल्या १.६४ लाख कार्स ) होंडाच्या इलेक्ट्रिक बाईकमध्ये काय असेल खास? होंडाने बाईकमध्ये उत्कृष्ट तंत्रज्ञान दिले असून या बाईकला स्वॅप करण्यायोग्य बॅटरी देण्यात येणार आहे. ज्यामुळे तुम्हाला रेंजची समस्या येणार नाही. उल्लेखनीय आहे की, होंडा २०३० पर्यंत जागतिक स्तरावर ३० नवीन इलेक्ट्रिक मोटरसायकल सादर करणार आहे. या बाईक्समध्ये प्रगत कनेक्टिव्हिटीसोबतच ओटीए अपडेट आणि डेटा कलेक्शन सिस्टीम यांसारखे तंत्रज्ञान दिले जाईल. बाईकची रेंजही मोठ्या प्रमाणात सुधारली जाईल. स्वॅप करण्यायोग्य बॅटरी तंत्रज्ञानासोबतच कंपनी देशातील पायाभूत सुविधांचाही विकास करणार असल्याचे सांगण्यात येत आहे. आगामी काळात कंपनी मोटारसायकलमध्ये LFP बॅटरी सेल वापरणार आहे. यामुळे ते केवळ सुरक्षित होणार नाहीत तर त्यांची श्रेणीही लक्षणीय वाढेल. आगामी वाहनांमध्ये सध्या फक्त लिथियम आयन बॅटरीचा वापर केला जाणार असला तरी लवकरच कंपनी त्यात बदल करणार आहे.
