भाजपा प्रदेशाध्यक्ष बी.एस.येडियुरप्पा येत्या महिन्याभरात कर्नाटकचे मुख्यमंत्री होतील असा दावा दोन ज्योतिषांनी केला आहे. विद्वान गणेश हेगडे आणि पवन जोशी अशी या दोघांची नावे आहेत. आपण येडियुरप्पा यांच्या जन्मकुंडलीचा अभ्यास केला असून पाच मार्चपर्यंत ते राज्याचे मुख्यमंत्री बनतील असे या दोन ज्योतिषांनी म्हटले आहे. असे घडले नाही तर आपण ज्योतिष सांगणे बंद करु असे या दोघांनी सांगितले आहे. यापूर्वी केलेली भविष्यवाणी खरी ठरली आहे. काँग्रेस आणि जेडीएस आघाडी सरकार स्थापन करतील ही आपली भविष्यवाणी खरी ठरली. २००८ मध्ये आपण येडियुरप्पा सरकार स्थापन करतील असे म्हटले होते आणि घडले सुद्धा तसेच असे हेगडे यांनी सांगितले. जन्मकुंडलीची सध्याची स्थिती त्यांचे ग्रह अनुकूल असल्याचे दाखवते. पण मुख्यमंत्री म्हणून ऑक्टोंबरपर्यंतचा त्यांचा कार्यकाळ खडतर असेल. एच.डी.कुमारस्वामी यांच्या ग्रहांची स्थिती खूपच खराब आहे. त्यांनी किती होम हवन केले तरी त्यांना सत्ता गमवावी लागेल असे हेगडे यांनी म्हटले आहे. मार्चनंतर नरेंद्र मोदी यांची लोकप्रियता आणखी वाढेल तसेच भाजपा लोकसभेत २८५ पेक्षा जास्त जागा जिंकेल असा या दोघा ज्योतिषांचा दावा आहे.
