आपल्या सहकाऱ्यावर बलात्कार केल्याप्रकरणी हवाई दलाच्या एका अधिकाऱ्याला अटक करण्यात आली आहे. कोईम्बतूर एअरफोर्स कॉलेजमध्ये ट्रेनिंगसाठी आलेल्या या अधिकाऱ्याला बलात्काराच्या आरोपाखाली बेड्या ठोकण्यात आल्या आहेत. ऑगस्ट महिन्यात देशभरातून एकूण ३० हवाई दल अधिकारी कोईम्बतूर एअरफोर्स कॉलेजमध्ये ट्रेनिंगसाठी आले होते. पीडित २९ वर्षीय महिला अधिकाऱी १० सप्टेंबरला बास्केटबॉल खेळताना जखमी झाली होती. तिचा पाय जखमी झाला होता. यामुळे झोपण्यापूर्वी तिने पेनकिलर घेतलं होतं. महिला अधिकाऱ्याने केलेल्या आरोपानुसार, मध्यरात्री जेव्हा जाग आली तेव्हा तिच्या अंगावर कोणतेही कपडे नव्हते आणि आरोपी अधिकारी तिच्या शेजारी झोपलेला होता. यावेळी त्याच्या अंगावरही कपडे नव्हते. यानंतर आपण वरिष्ठ अधिकाऱ्यांकडे तक्रार केली, मात्र कोणतीही कारवाई झाली नाही असा महिला अधिकाऱ्याचा आरोप आहे. यानंतर तिने कोईम्बतूर शहराच्या पोलीस आयुक्तांकडे आणि गांधीपूरम महिला पोलिसांकडे तक्रार केली. तपासाअंती लेफ्टनंट असणाऱ्या आरोपी अधिकाऱ्याला अटक करण्यात आली. आरोपीला रविवारी सकाळी दंडाधिकाऱ्यासमोर हजर करण्यात आलं. आरोपीच्या वकिलांनी कोईम्बतूर पोलीस अटक करु शकत नाही असं प्रतिज्ञापत्र सादर केलं. दरम्यान पोलिसांनी प्रतिज्ञापत्र दाखल करण्यासाठी वेळ मागितला आहे.