पीटीआय, ढाका : बांगलादेशची राजधानी ढाक्यामधील एक सात मजली व्यावसायिक इमारत स्फोटाने हादरली. त्यामध्ये किमान १७ जण ठार झाले आणि शंभरपेक्षा जास्त लोक जखमी झाले अशी माहिती पोलिसांनी दिली. स्फोटानंतर लागलेली आग विझवण्यासाठी अग्निशामक दलाची अनेक पथके घटनास्थळी रवाना झाली. स्थानिक वेळेनुसार दुपारी पावणेपाच वाजता हा स्फोट झाला. ही इमारत जुन्या ढाक्यामध्ये गुलिस्तान या गर्दीच्या भागात आहे. हा स्फोट इमारतीच्या तळमजल्यावर झाला आणि पहिल्या दोन मजल्यांचे बरेच नुकसान झाले अशी माहिती अग्निशमन दलाच्या अधिकाऱ्यांनी दिली. ही घटना अपघाती असावी आणि त्यामध्ये कोणताही घातपात नसावा असा पोलिसांचा प्राथमिक अंदाज आहे. पण त्या शक्यतेचाही तपास केला जाईल असे सांगण्यात आले. स्फोटाचे कारण अधिकृतरित्या समजू शकलेले नाही. मात्र, इमारतीमध्ये बेकायदेशीरपणे साठवलेल्या रसायनांमुळे हा स्फोट झाला असावा असा संशय आहे. आधी मला भूकंप झाला असे वाटले. या स्फोटामुळे संपूर्ण सिद्दीक बाजार हादरला. स्फोटानंतर मला इमारतीसमोरील रस्त्यावर २० ते २५ जण पडलेले दिसले. ते गंभीर जखमी झाले होते आणि रक्तस्राव होत होता. ते मदतीसाठी ओरडत होते. काही लोक घाबरून सैरावैरा पळत होते. - सफायत हुसैन, प्रत्यक्षदर्शी