आपल्या प्रत्येकांचीच ठराविक अशी काही आवडीची गाणी असतात. अशी गाणी जी आपण अनेकदा ऐकतो आणि परत परत ऐकतो. ब्रेकअप झालं असेल तर ती व्यक्ती त्यासंदर्भातली गाणी ऐकतो. करण जोहरही तुमच्यासाठी ब्रेकअपचं गाणं घेऊन येतोय. पण हे गाणं इतर ब्रेकअपच्या गाण्यांपेक्षा वेगळं आहे. 'ऐ दिल है मुश्किल' या त्याच्या आगामी सिनेमात ब्रेकअपचे गाणे हे दुःख व्यक्त करणारे नसून पार्टी करताना चित्रित केले गेले आहे. त्यामुळे प्रत्येकवेळी प्रेमभंग झाल्यावर रडलेच पाहिजे असे नाही तर कधी कधी पार्टीही केली पाहिजे असा मेसेज कदाचित करणला या गाण्यातून द्यायचा आहे. 'ब्रेकअप साँग, दर्दे दिल की फिलिंग साँग' असे या गाण्याचे बोल आहेत. अनुष्का शर्मा आणि रणबीर कपूर हे एका पबमध्ये या गाण्यावर थिरकताना दिसत आहे. धर्मा प्रोडक्शनच्या अंतर्गत बनणाऱ्या या सिनेमात ऐश्वर्या राय-बच्चन, रणबीर कपूर, अनुष्का शर्मा यांच्या मुख्य भूमिका आहेत. तर फवाद खान पाहूण्या कलाकाराच्या भूमिकेत दिसणार आहे. करणने या गाण्याचे टिझर त्याच्या ट्विटर अकाऊंटवरुन शेअर केले. ब्रेकअप गाण्याच्या आधी 'ऐ दिल है मुश्किल', 'बुल्लेया' आणि 'चन्ना मेरेया' ही तीन गाणी प्रदर्शित करण्यात आली आहेत. पाकिस्तानी कलाकार फवाद खान याला भारतात काम करण्यावर बंदी घालण्यात आल्यानंतर तो मायदेशी परतला. या सिनेमात त्याची भूमिका असल्यामुळे मनसेने हा सिनेमा प्रदर्शित होऊ देणार नाही अशी धमकीच दिली आहे. येत्या २८ ऑक्टोबरला प्रदर्शित होणारा हा सिनेमा त्याच दिवशी प्रदर्शित होणार की नाही हे तर आता येणारा काळच सांगेल.
