मुंबई सेंट्रल येथील वोक्हार्ट रुग्णालयातील परिचारिकांसह ५० आरोग्य कर्मचाऱ्यांना करोनाची लागण झाल्याचे सोमवारी निदर्शनास आले. प्रतिबंधित विभाग म्हणून जाहीर केलेल्या या रुग्णालयाच्या चौकशीसाठी पालिकेने समिती नियुक्त केली आहे. मुंबईत साठहून अधिक रुग्ण जी दक्षिण विभागात आढळले असून त्या खालोखाल अधिक रुग्ण आता वोक्हार्ट रुग्णालयात नोंदवले गेले आहेत. वोक्हार्ट रुग्णालयात कस्तुरबा रुग्णालयातून २ संशयित आणि २ करोनाबाधिता रुग्ण दाखल झाले होते. बाधित रुग्णांना विलगीकरण कक्षामध्ये ठेवले असले तरी रुग्णालयाने संशयित रुग्णांना मात्र इतर रुग्णांसोबत अतिदक्षता विभागात ठेवले. काही दिवसांतच या रुग्णांनाही करोनाची लागण झाल्याचे निदान झाले. परंतु तोपर्यंत अतिदक्षता विभागात काम करणारे अनेक कर्मचारी रुग्णांच्या संपर्कात आले होते.
