बुलढाणा : विदर्भात अकोल्याचे तापमान सर्वाधिक नोंदवले गेले. आज ४१.५ अंश सेल्सिअस तापमानाची नोंद झाली. याखालोखाल वाशीम ४१.४ तर विदर्भाच्या तुलनेत ‘सुसह्य तापमान’ असणाऱ्या बुलढाणा शहरानेही ४० चा आकडा पार केला. यामुळे आजचा मंगळवार अकोला, वाशीम आणि बुलढाणावासीयांच्या जीवाची काहिली करणारा ठरला. मंगळवार, २६ मार्चला बुलढाणा शहरात ४०.२ अंश सेल्सिअस तापमानाची नोंद झाली. यंदा आजवरच्या उन्हाळ्यातील हे सर्वाधिक तापमान ठरले. या तुलनेत किमान तापमान २२.६ अंश इतके होते. मागील सहा दिवसांपासून बुलढाण्याचे तापमान ३७.४ ते ३७.८ दरम्यान रेंगाळत होते. मात्र, आज तापमानाने चाळीशी पार केली. यामुळे बुलढाणावासीयांसाठी आजचा दिवस असह्य ठरला. रोजे ठेवणाऱ्या हजारो मुस्लीम बांधवांची कठोर परीक्षा घेणारा हा दिवस ठरला. हेही वाचा >>>“बुलढाण्यातून सुजात आंबेडकर यांनी लढावे किंवा स्थानिक उमेदवार द्यावा,” वंचितच्या बैठकीत ठराव पारित मार्चमध्ये बुलढाण्याचे कमाल तापमान ३५ अंशाच्या आसपास राहते. मात्र यंदा त्याने मार्चमध्येच चाळीसचा आकडा पार केला. कमालच्या तुलनेत किमान तापमान २० ते २३ अंशादरम्यान राहत आहे. यामुळे आजार व रुग्ण संख्येत वाढ होत आहे.