नागपूर: उपमुख्यमंत्री व राष्ट्रवादीच्या फुटीर गटाचे नेते अजित पवार यांच्यावर पुण्याच्या माजी पोलीस आयुक्त मीरा बोरवणकर यांनी केलेल्या आरोपाचे प्रकरण सध्या राजकीय वर्तुळात चांगलेच गाजत आहे. सोमवारी प्रथमच या प्रकरणी फडणवीस यांनी प्रतिक्रिया दिली. फडणवीस एका कार्यक्रमासाठी नागपुरात आले असता माध्यमांनी त्यांना बोरवणकर यांनी अजित पवार यांच्यावर केलेल्या आरोपांबाबत विचारले. ते म्हणाले "बोरवणकर यांनी काय आरोप केले याची मला कल्पना नाही. मी त्यांचे पुस्तकही वाचले नाही." पोलीस निवासस्थानांसाठी राखीव भूखंडाचा लिलाव करण्याबाबत तत्कालीन पालकमंत्री म्हणून दादांनी दबाव आणला होता असा उल्लेख बोरवणकर यांचा पुस्तकात आहे. हे येथे उल्लेखनीय. कॉंग्रेस नेते विजय वडेट्टीवार यांनी या प्रकरणाची चौकशीची मागणी केली आहे.
