बॉलीवूडमध्ये काम शोधण्यासाठी गुजरातहून मुंबईत आलेल्या एका १९ वर्षीय तरुणावर सामूहिक बालत्कार केल्याची धक्कादायक घटना ठाण्यात समोर आली आहे. मॉडेल असणाऱ्या या तरुणाला बॉलीवूडमध्ये संधी देतो असं सांगत एका व्यक्तीने त्याच्यासोबत ओळख वाढवली. त्यानंतर या तरुणाला मारहाण करुन लूटण्यात आलं. इतकचं नाही तर मुंबईतील एका निर्जनस्थळी असणाऱ्या इमारतीवरील गच्चीवर त्याच्यासोबत दुष्कर्म करण्यात आलं. ठाण्यात आपल्या नातेवाईकांकडे राहणारा हा तरुण सोशल मीडियाच्या माध्यमातून आरोपींच्या संपर्कात आला होता. आधी या दोघांची भेट झाली. त्यानंतर पुनिक शुक्ला नावाच्या व्यक्तीने या तरुणाला तुझी इतर मित्रांशी भेट घडवतो सांगून भेटण्यासाठी बोलवलं. शुक्ला या तरुणाला त्याच्या एका मित्रांसोबत भेटला. हे दोघे या तरुणाला एका निर्जनस्थळी असणाऱ्या इमारतीच्या गच्चीवर घेऊन गेले. काही वेळाने तिथे आणखीन दोन जण आले. या चौघांनी मिळून या तरुणावर बलात्कार केला. या तरुणाने चौघांना विरोध केला असता त्यांनी त्याला लाथा, बुक्क्यांनी तसेच काठीने बेदम मारहाण केली. शुक्लाने या संपूर्ण घटनाक्रम कॅमेरामध्ये कैद केला. त्यानंतर त्यांनी या मुलाचा फोन आणि पाकीटही काढून फेकून दिलं. त्यानंतर या तरुणाला धमकी देत आरोपींनी घटनास्थळावरुन पळ काढल्याचे मिड डेने दिलेल्या वृ्त्तात म्हटलं आहे. हा संपूर्ण प्रकार रविवारी संध्याकाळी घडला. वागळे इस्टेट पोलीस स्थानकातील अधिकाऱ्यांनी यासंदर्भात माहिती देताना, "एका वापरात नसणाऱ्या इमारतीच्या गच्चीवर हे दोघेजण या तरुणाला घेऊन गेले. त्यानंतर तिथे इतर दोनजण आले," असं पोलिसांनी सांगितलं आहे. त्यानंतर या चौघांनी तरुणावर अत्याचार केले. तसेच घटनास्थळावरुन पळ काढण्याआधी त्यांनी या मुलाने घडलेल्या घटनेची कुठे वाच्यता केल्यास किंवा पोलिसांकडे तक्कार केल्यास शूट केलेला या लैंगिक अत्याचाराचा व्हिडीओ सोशल मीडियावर व्हायरल करण्याची धमकी दिली. नंतर या तरुणाने आपला फोन शोधून नातेवाईकाचं घर गाठलं. त्यानंतर नातेवाईकांनी त्याला विश्वासात घेऊन घडलेल्या प्रकारासंदर्भात विचारले असता त्याने सर्व घडलेली घटना त्यांना सांगितली. त्यानंतर पोलीस स्थानकामध्ये तक्रार दाखल करण्यात आली असून पोलीस पुढील तपास करत आहेत.
