महापालिका निवडणुकीच्या तोंडावर मनसेच्या फलकांवर छबी इमारतीबाहेर पाणीपुरी विकणाऱ्या विक्रेत्याच्या तांब्यातील लघुशंकेचे किळसवाणे कृत्य लोकांसमोर आणून पाच वर्षांपूर्वी प्रकाशझोतात आलेली नौपाडय़ातील अंकिता राणे ही तरुणी महापालिका निवडणुकांच्या तोंडावर ठाण्यातील मनसेच्या फलकांवर झळकू लागली आहे. फेरीवाल्याच्या किळसवाण्या कृत्याचे अंकिताने केलेले चित्रीकरण केवळ ठाणेच नव्हे तर अवघ्या महाराष्ट्राच्या चर्चेचा विषय ठरला होता. या घटनेनंतर प्रांतीय-परप्रांतीय असा राजकीय वादही पेटला होता. त्याच वादाला आता फोडणी देत मनसेने ठाण्यातील सेना-भाजपचा परंपरागत किल्ला असलेल्या नौपाडय़ात अंकिताचे फलक झळकावण्यास सुरुवात केली आहे.ठाण्यातील नौपाडा परिसर शिवसेना-भाजपचा बालेकिल्ला मानला जातो. या परिसरात वास्तव्य करणाऱ्या अंकिताने तिच्या इमारती बाहेरील रस्त्यावर पाणीपुरीवाल्याला लोटय़ात लघुशंका करताना पाहिले. या किळसवाण्या प्रकाराचे चित्रीकरण करून पाणीपुरीवाल्याचे बिंग फोडले. विविध माध्यमांतून ही चित्रफीत प्रसारित होताच राज्यभर खळबळ उडाली. त्याचा पुरेपूर फायदा उचलत मनसेने परप्रांतीयांविरोधातील आपल्या भूमिकेला पाश्र्वभूमी निर्माण केली. मनसे अध्यक्ष राज ठाकरे यांनीदेखील अंकिताची भेट घेऊन तिच्या धाडसाचे कौतुक केले होते. दुसरीकडे, भाजपचे तत्कालीन मुंबई शहर अध्यक्ष राज पुरोहित यांनी अंकिताबद्दल केलेल्या चुकीच्या वक्तव्यामुळे या मुद्दय़ाने चांगलाच पेट घेतला होता. पाच वर्षांपूर्वी घडलेल्या या प्रकरणानंतर आता अंकिता राणे पुन्हा प्रकाशझोतात आली आहे. नौपाडय़ातील मनसेच्या विविध फलकांवर अंकिता राणेची छबी झळकू लागली आहे. त्यामुळे आगामी महापालिका निवडणुकीत मनसे नौपाडा परिसरातून अंकिताला उमेदवारी देईल, असे विश्वसनीय वृत्त आहे. शिवसेना आणि भाजप यांचा मतदारवर्ग मोठय़ा प्रमाणात असलेल्या नौपाडा परिसरात आपले आव्हान निर्माण करण्यासाठी मनसेने ही खेळी केल्याचे बोलले जात आहे. नौपाडा व पाचपाखाडी हा परिसर या शिवसेना व भाजप या पक्षांच्या दृष्टीने महत्त्वाचा असून दोन्ही पक्षांची ताकद या परिसरांत मोठी आहे. अशा वेळी अंकिताच्या रूपात सर्वसामान्यांच्या कौतुकाचा विषय ठरलेल्या तरुणीला आपल्या पक्षातून उमेदवारी देऊन नौपाडय़ात स्वत:चे स्थान निर्माण करण्याचा मनसेचा प्रयत्न आहे. विधी शाखेची पदवीधर असलेल्या अंकिताला मनसेने नुकतेच उपाध्यक्षपद बहाल केले आहे. तरुण पिढीची राजकारणाला आवश्यकता असल्याने आपण मनसेचा झेंडा खांद्यावर घेतल्याचे अंकिताने ‘लोकसत्ता’शी बोलताना सांगितले. या प्रकरणी मनसेचे शहर अध्यक्ष अविनाश जाधव यांच्याशी संपर्क साधला असता त्यांनी अंकिताला पक्ष निवडणुकीच्या रिंगणात उतरविणार आहे, असे सांगितले.
