ओडिशाच्या एका गावातून हैराण करणारी घटना समोर आली आहे. मलकानगिरी जिल्ह्यातील कलडापल्ली गावात लोकांनी एका मगरीला पकडून मारुन टाकलं, इतकंच नाही तर त्या मगरीचं मांस देखील खाल्लं. या घटनेचे छायाचित्र सोशल मीडियामध्ये व्हायरल झाल्यानंतर प्रशासन आणि वन विभागात खळबळ उडाली असून वन विभागाचे अधिकारी मगरीला मारुन टाकणाऱ्या आणि खाणाऱ्या लोकांचा शोध घेत आहे. कलडापल्ली गावाच्या पोडिया ब्लॉकजवळ एक साबेरी नदी आहे. बुधवारी काही गावकऱ्यांना या नदीमध्ये मगर दिसली, त्यांनी त्या मगरीला पकडून तिची हत्या केली व दोरी बांधून तिला झाडाला लटकवलं. त्यानंतर काही जणांनी धारधार शस्त्राने मगरीचे तुकडे करुन मांस खाल्लं. सोशल मीडियावर या घटनेचे फोटो व्हायरल होत आहेत. Some #Odias reacted like Chinese people, cooked a #crocodile & eating in feast, it's happened at Padia block of Soriguda village of Malkangiri district in Odisha pic.twitter.com/rh4IniwvfV — Nalini kumar Rout (@RoutDilu) July 2, 2020 दरम्यान, "आम्हाला या घटनेची माहिती मिळताच, काही अधिकारी गावात गेले. पण तिथे आम्हाला काही मिळालं नाही. या घटनेचा तपास करण्यासाठी तीन पथकांची नियुक्ती करण्यात आली असून मगरीची हत्या करुन खाणाऱ्यांना लवकरच ताब्यात घेतलं जाईल", अशी माहिती वन अधिकारी प्रदीप मिरसे यांनी वृत्तसंस्था एएनआयशी बोलताना दिली आहे.