FIFA World Cup 2018 FRA vs BEL : फिफा विश्वचषक स्पर्धेत आज पहिल्या उपांत्य फेरीच्या सामन्यात फ्रान्स आणि बेल्जियम यांच्यात झुंज झाली. या सामन्यात फ्रान्सचा बचावपटू उमटिटी याने केलेल्या एकमेव गोलच्या जोरावर फ्रान्सने सामना जिंकला आणि स्पर्धेच्या अंतिम सामन्यात धडक मारली. १९९८ पासून तिसऱ्यांदा फ्रान्सचा संघ अंतिम फेरीत पोहोचला आहे. सामन्याचा पूर्वार्ध हा गोलशून्य बरोबरीत सुटला. सामन्याच्या तिसऱ्या आणि १३व्या मिनिटाला फ्रान्सला गोलची संधी मिळाली, पण त्यांना चेंडू गोलपोस्टवर मारताच आला नाही. अखेर सामन्याच्या १९व्या मिनिटाला बेल्जियमकडून पहिला प्रयत्न झाला, पण फ्रान्सच्या बचावपटूने तो प्रयत्न हणून पाडला. पाठोपाठ लगेचच २१व्या मिनिटाला बेल्जियमने कॉर्नर किकला दिशा देत जोरदार आक्रमण केले, पण फ्रान्सचा कर्णधार आणि गोलरक्षक ह्युगो लॉरिस याने कमालीची उडी घेत हा गोल रोखला. त्यानंतर ३९व्या मिनिटाला फ्रान्सने केलेले आक्रमण बेल्जियमचा गोलरक्षक कॉर्टोईसने रोखले. त्यामुळे पूर्वार्धात दोनही संघांना एकही गोल करता आला नाही. विश्वचषक स्पर्धेतील उपांत्य फेरीच्या गेल्या १२ सामन्यांपैकी ९ सामने हे पूर्वार्धात गोलशून्य बरोबरीत सुटले होते. उत्तरार्धात मात्र फ्रान्सकडून तीव्र आणि आक्रमक खेळ पाहायला मिळाला. त्याचे फळ त्यांना लगेचच मिळाले. ५१व्या मिनिटाला फ्रान्सकडून बचावपटू सॅम्युअल उमटिटीने हेडरच्या माध्यमातून गोल केला. कॉर्नरवरून आलेल्या चेंडूला त्याने योग्य दिशा दिली. ग्रीझमनने या गोलमध्ये सहाय्यक खेळाडूची भूमिका पार पाडली. उमटिटीचा हा कारकिर्दीतील तिसरा गोल ठरला. त्यानंतर आक्रमक खेळ करण्याच्या नादात बेल्जियमला २ पिवळी कार्ड दाखवण्यात आली. सामन्यांच्या निर्धारित वेळेनंतर ६ मिनिटांच्या अतिरिक्त कालावधीतही बेल्जियमला बरोबरी साधता आली नाही.
