India Alliance Meeting: केंद्रातील मोदी सरकारविरोधात देशभरातील विरोधी पक्ष ‘इंडिया’ आघाडीच्या नेतृत्वाखाली एकत्र आले आहेत. ‘इंडिया’ आघाडीची तिसरी बैठक मुंबईत सुरू आहे. या बैठकीला देशभरातील २८ पक्षांच्या प्रमुख नेत्यांनी हजेरी लावली आहे. या बैठकीवर सत्ताधारी भाजपाकडून टीका सुरू आहे. तसेच एनडीएतील घटक पक्षांचे नेतेही इंडिया आघाडीला लक्ष्य करत आहेत. महाराष्ट्राचे मुख्यमंत्री आणि शिवसेनेच्या शिंदे गटाचे प्रमुख एकनाथ शिंदे यांनी काही वेळापूर्वी प्रसारमाध्यमांशी बातचीत केली. यावेळी एकनाथ शिंदे यांनी इंडिया आघाडीवर तसेच मुंबईतल्या बैठकीचं यजमानपद भूषवणाऱ्या उद्धव ठाकरे यांच्यावर टीका केली.