चालू वर्षांला निरोप देण्याचे दिवस जवळ आले असतानाच भांडवली बाजारांनी मंगळवारी एकाच दिवसात २०१४ मधील सर्वात मोठी आपटी नोंदविली. याचबरोबर सेन्सेक्सने २७ हजारांचा टप्पा तर निफ्टीने ८,१००चा स्तरही सोडला. मोदी लाटेवर डिसेंबरअखेर सेन्सेक्सच्या ३० हजारांचे बाजार विश्लेषकांचे मनसुबे या घसरणीने धुळीला मिळाले आहेत.आठवडय़ातील दुसऱ्या सत्रात सेन्सेक्सने ५३८.१२ अंश तर निफ्टीने १५२ अंश घसरण नोंदविली. दोन्ही निर्देशांक अनुक्रमे २६,७८१.४४ व ८,०६७.६० वर बंद झाले. दोहोंतील घसरण जवळपास दोन टक्क्यांची राहिली.आंतरराष्ट्रीय बाजारात कच्च्या तेलाच्या किमती प्रति पिंप ६० डॉलरच्याही खाली येत असताना आणि भारतात डॉलरच्या तुलनेत रुपयाचा प्रवास गेल्या १३ महिन्यांच्या तळात होत असताना भांडवली बाजारातील घसरणीला जागतिक प्रमुख निर्देशांक आपटीची साथ मिळाली. परकीय चलन व्यासपीठावर मंगळवारच्या सत्रात डॉलरसमोर ६४ पर्यंत नांगी टाकणाऱ्या रुपयामुळे विदेशी गुंतवणूकदारांनीही भांडवली बाजारातून अंग काढून घेण्याचा प्रयत्न केला. कच्च्या तेलाचा गेल्या सहा वर्षांतील नीचांक स्थानिक गुंतवणूकदारांमध्येही धडकी भरवून गेला.नोव्हेंबरमधील किरकोळ तसेच घाऊक महागाई दर कमी नोंदला गेला असला तरी सोमवारी जाहीर झालेल्या गेल्या महिन्यातीलच वाढत्या व्यापार तुटीने बाजारात कमालीची अस्वस्थता निर्माण केली. सोने आयातीत सहा पट वाढीने दीड वर्षांच्या उच्चांकावर पोहोचलेल्या व्यापार तुटीने बाजारात समभागांची जोरदार विक्री होणे अपेक्षित ठरले. तर आंतरराष्ट्रीय घडामोडींचाही बाजाराच्या घसरणीवर तेवढाच परिणाम झाला. अमेरिकेच्या फेडरल रिझव्‍‌र्हची बैठक सुरू झाली आहे तर रशियाने व्याज दरवाढ केली आहे. या पाश्र्वभूमीवर आघाडीचे जागतिक निर्देशांकही आपटले. याचा येथे लाभ उठविण्याच्या हेतूने विदेशी संस्था गुंतवणूकदारांनी नफेखोरी अवलंबिली. सेन्सेक्समधील केवळ तीनच समभाग वधारते राहिले. उर्वरित २७ समभागांचे मूल्यही आपटले. यामध्ये सेसा स्टरलाइट, डॉ. रेड्डीज, हिंदाल्को, स्टेट बँक हे आघाडीवर राहिले. टाटा पॉवर, आयसीआयसीआय बँक, एनटीपीसी, आयटीसी, टाटा स्टील, एचडीएफसी यांनाही घसरणीचा फटका बसला. किरकोळ गुंतवणूकदारांचे आकर्षण असलेले स्मॉल (-३.३६%) व मिड (-२.९६%)कॅपही आपटले. मुंबई शेअर बाजारातील १२ पैकी १० क्षेत्रीय निर्देशांक घसरले. भक्कम अमेरिकी चलनामुळे महसूलवाढीच्या अपेक्षेने माहिती तंत्रज्ञान निर्देशांक मात्र वधारता राहिला. यामध्ये टीसीएसने ३.४० टक्के तर इन्फोसिसने ०.६९ टक्के वाढ नोंदविली. सेन्सेक्सने यापूर्वी एकाच व्यवहारात सर्वात मोठी आपटी ६५१ अंशांची नोंदविली आहे. मात्र ती गेल्या वर्षांतील होती. ३ सप्टेंबर २०१३ नंतर बाजाराची मोठी आपटी २०१४ ची अखेर होण्याच्या टप्प्यात नोंदली गेली आहे.आशियाई बाजारातही अडीच टक्क्य़ांची घसरणभारतीय भांडवली बाजाराप्रमाणेच विदेशातील प्रमुख निर्देशांकातही मोठी आपटी नोंदवली गेली. फेडरल रिझव्‍‌र्हच्या मंगळवारपासून सुरू झालेल्या दोन दिवसांच्या बैठकीच्या पाश्र्वभूमीवर येथील नॅसडॅकसारख्या निर्देशांकात सोमवारीच एक टक्क्य़ांची घसरण झाली. तर घसरत्या रूबल चलनामुळे व्याजदर कपातीचा निर्णय घ्यावे लागलेल्या रशियाचा समावेश असलेल्या एकूण युरोपीय निर्देशांकांमध्ये संमिश्र वातावरण दिसले. भारतीय बाजाराप्रमाणे आशियाई बाजारात तब्बल २.५० टक्क्य़ांपर्यंतची घसरण मंगळवारच्या एकाच सत्रात नोंदली गेली.आंतरराष्ट्रीय बाजारात कच्च्या तेलाच्या किमती प्रति पिंप ६० डॉलरच्याही खाली आल्याने अमेरिकी भांडवली बाजारात सोमवारी मोठी घसरण.युरोपसह आशियाई बाजाराती मंगळ्वारच्या मोठय़ा घसरणीची पडछायाही स्थानिक बाजाराती उमटली.डॉलरसमोर ६४ पर्यंत नांगी टाकणाऱ्या रुपयामुळे विदेशी गुंतवणूकदारांना बाजारातून अंग काढून घेण्याला चालना मिळालीरुपयाचे अवमूल्यन आणि सोने आयातीत सहा पट वाढीने दीड वर्षांच्या उच्चांकावर पोहोचलेल्या व्यापार तुटीने बाजारात अस्वस्थतता वाढली.कच्चे तेल ६० डॉलरच्याही खालीमुंबई : गेल्या काही महिन्यांपासून माफक पुरवठा असलेल्या कच्च्या तेलाचे दर कमालीने घसरत असून मंगळवारी तर काळ्या सोन्याने प्रति पिंप ६० डॉलरची पातळीही सोडली. सर्वाधिक मागणी असलेले ब्रेन्ट क्रूड आता ५९ डॉलर प्रति पिंपनजीक विसावले आहे. तर इंधन मागणीत स्वयंपूर्ण होऊ पाहणाऱ्या अमेरिकेतील कच्च्या तेलाचे दर ५४ डॉलर प्रति पिंप नोंदले गेले आहेत. जून २००९ नंतरचा हा नीचांक तेल दर आहे. प्रमुख तेल उत्पादकांच्या रविवारच्या बैठकीत तेल उत्पादन आहे त्या स्तरावर कायम ठेवण्याचा निर्णय झाल्यानंतर इंधन दरातील घसरण अधिकच विस्तारली जात आहे. आंतरराष्ट्रीय बाजारात कच्च्या तेलाचे दर २०१४ मध्ये सर्वाधिक अशा ११५ डॉलर प्रति पिंपपर्यंत पोहोचलेले आहेत. मेमधील या टप्प्यानंतर त्यात गेल्या काही दिवसांपासून सातत्याने घसरण होत आहे.मागणी कमी आणि पुरवठा अधिक या समीकरणामुळे कच्च्या तेलाचे दर खाली येत आहे. असे असूनही बाजार हिस्सा गमावण्याच्या भीतीने आखाती देशातील तेल उत्पादक देश उत्पादन कमी करण्यास तयार नाहीत. अमेरिकेनंतर तेलाची सर्वाधिक मागणी नोंदविणाऱ्या चीनची औद्योगिक प्रगती गेल्या सात महिन्यांत प्रथमच मंदावल्याने तेलाच्या घसरत्या किमतीत अधिक भर पडत आहे. मोठा तेल उत्पादक असलेल्या रशियाच्या मध्यवर्ती बँकेने व्याजदर थेट १७ टक्क्यांवर नेऊन ठेवण्यानेही तेल दरांवर परिणाम झाला आहे. स्थानिक चलन रुबेलचे अवमूल्यन रोखण्यासाठी व्याज दरवाढ केली गेली आहे.रुपयाची ६४ खाली गटांगळी!मुंबई: गेल्या काही सत्रांपासून डॉलरच्या तुलनेत ६२ च्या खालचा प्रवास नोंदविणाऱ्या भारतीय चलनाने मंगळवारी गेल्या दीड वर्षांच्या उच्चांकाला पोहोचलेल्या व्यापार तुटीबद्दल चिंता व्यक्त करत ६४ नजीकचा तळ गाठला. एकाच व्यवहारातील थेट ५९ पैशांच्या आपटीने रुपयाही ६३.५३ पर्यंत घसरताना गेल्या १३ महिन्यांच्या नीचांकावर येऊन ठेपला. सत्रात ६३.५९ पर्यंत घसरणाऱ्या रुपयाने १३ नोव्हेंबर २०१३ च्या समकक्ष पोहोचला. सोमवारच्या ६२.९५ च्या तुलनेत ६३.२५ वर खुला झालेला रुपया मंगळवारी व्यवहारात हाच वरचा टप्पा राखणारा ठरला. चलनात आठवडय़ातील दुसऱ्या सत्रात जवळपास पाऊण टक्क्यांची आपटी नोंदली गेली. गेल्या चार महिन्यांतील एकाच व्यवहारातील ही सर्वात मोठी आपटी होती. रुपया सप्ताहारंभीदेखील ६५ पैशांनी आपटला होता.मंगळवारच्या भांडवली बाजाराच्या मोठय़ा आपटीस जबाबदार असणाऱ्या विदेशी संस्थागतांनी वाढत्या अमेरिकी चलनाची मागणी नोंदविल्याने रुपयावरील दबाव सलग दुसऱ्या सत्रात नोंदला गेला. भक्कम डॉलरमुळे भांडवली बाजारात मात्र माहिती तंत्रज्ञान निर्देशांक ४.६ टक्क्यांपर्यंत झेपावले.बुधवारी चलन ६४ चा तळ गाठेल, असा चलन व्यवहारतज्ज्ञांचा होरा असतानाच मुंबईत कार्यक्रमानिमित्त आलेल्या केंद्रीय वाणिज्य सचिवांनी चलनाचा असा प्रवास दीर्घकाळ राहिल्यास सरकारसाठी ती चिंतेची बाब असेल, असे म्हटले.
