पुण्यात वाहतूक पोलिसाला मारहाण केल्याची घटना ताजी असतानाच पिंपरी चिंचवडमधील हिंजवडीत आणखी एका वाहतूक पोलिसाला धक्काबुक्की झाल्याचा प्रकार समोर आला आहे. शिवाजी चौकात नो एन्ट्रीतून निघालेल्या कॅब चालकाने मल्हारी वाघमारे या वाहतूक पोलिसाच्या पायावर गाडी घातली. वाघमारे यांनी गाडीवर थाप मारल्याने कॅब चालक विद्याधर अवताडेने वाघमारे यांना धक्काबुक्की करत शिवीगाळ केली. हिंजवडी पोलीस स्टेशनमध्ये याप्रकरणी गुन्हा दाखल झाला आहे. मात्र अद्याप कॅब चालकाला अद्याप अटक करण्यात आलेली नाही. आज सकाळी साडे दहाच्या सुमारास ही घटना घडली. पुण्यापाठोपाठ पिंपरी चिंचवडमध्ये घडलेल्या या घटनेने वाहतूक पोलिसांच्या सुरक्षेचा प्रश्न ऐरणीवर आला आहे.
