ट्रेकिंग, गिर्यारोहण असे शब्द म्हटले, की अगदी सुरुवातीला धडधाकट शरीरे डोळय़ांपुढे येतात. डोंगरदऱ्यांमधून खडतर आव्हानांचा सामना करत धावणाऱ्या या विश्वामध्ये हे तितकेच खरेही आहे. पण या निसर्गनियमाला अपवाद अशी काही कणखर मनेही असतात. या अशा खऱ्या गिर्यारोहकांनाच ‘प्रहार’ या संस्थेतर्फे भटकंतीचे आवाहन करण्यात आले आहे.या संस्थेतर्फे येत्या ६ सप्टेंबर रोजी केवळ अपंगांसाठी शिवनेरी सहलीचे आयोजन केले आहे. कुठल्याही प्रकारच्या अपंगत्व असलेल्या व्यक्तीची या सहलीत सहभागी होण्याची इच्छा असल्यास ते या उपक्रमात सहभागी होऊ शकतात.भटकंतीची खूप इच्छा असतानाही केवळ अपंगत्वाअभावी ज्यांना अशा छंदात भाग घेता येत नाही, अशा गिर्यारोहकांच्या मदतीसाठी ‘प्रहार’ संस्थेतर्फे या उपक्रमाचे दरवर्षी आयोजन केले जाते.या पूर्वी या उपक्रमा अंतर्गत या विशेष गिर्यारोहकांनी महाराष्ट्राचे सर्वोच्च शिखर कळसुबाईवर स्वारी केली होती. या भटकंतीमध्ये अपंगांच्या मदतीसाठी स्वयंसेवकही असतात. यामध्ये सहभागी होण्यासाठी कुठलेही शुल्क घेतले जात नाही. या उपक्रमामध्ये सहभागी होण्यासाठी ३० ऑगस्ट पूर्वी नोंदणी करणे आवश्यक आहे. अधिक माहितीआणि नोंदणीसाठी शिवाजी गाडे (९४०३५९२७५०किंवा ९७३०८९२७५०) यांच्याशी संपर्क साधावा.
