मुंबई विमानतळाचा २३.५ टक्के वाटा अदानी समूहाने ताब्यात घेतला आहे. दोन दक्षिण आफ्रिकन कंपन्यांकडून अदानी समूहाने विमानतळाचा ताबा घेण्याची प्रक्रिया पूर्ण झाल्यासंदर्भातील माहिती अदानी समूहानेच जाहीर केली आहे. शनिवारी स्टॉक एक्सचेंजवर अदानी इंटरप्रायझेसच्या विमानतळ विभागाने बिडवेस्टचे १३.५ टक्के तर एअरपोर्ट कंपनी ऑफ साऊथ आफ्रीकाचे १० टक्के वाटा आपल्या नावावर केल्याची माहिती दिली. या टक्केवारीचे मूल्य एक हजार ६८५ कोटी रुपये इतके आहे. अदानी समूहाने हा वाटा स्वत:च्या ताब्यात घेतल्याने मुंबई विमानतळामधील परदेशी कंपन्यांची गुंतवणूक संपुष्टात आली आहे. मागील दोन वर्षांपासून अदानी समूह मुंबई विमानतळासंदर्भातील या व्यवहाराच्या प्रतिक्षेत होता. नक्की पाहा >> मोदी सरकारच्या काळात अदानींच्या २१ कंपन्यांना मंजूरी; जाणून घ्या Adani Agri Logistics आहे तरी काय? विमानतळांच्या खासगीकरण मोहिमेअंतर्गत अदानी समूहाने पूर्वीच भारतीय विमानतळ प्राधिकरणाकडून सहा विमानतळं ताब्यात घेतली आहे. मागील वर्षी ऑगस्ट महिन्यामध्ये अदानी समूहाने जीव्हीके ग्रुप सोबत करार केला होता. त्यानुसार जीव्हीकेच्या नावे असणारा ५०.५ टक्के वाटा अदानी समूहाच्या नावे करण्यात येण्याचं निश्चित झालं. त्याचप्रमाणे कंपनीने मुंबई विमानतळामध्ये वाटा असणाऱ्या दोन दक्षिण आफ्रिकन कंपन्यांशीही करार करुन त्यांच्याकडील २३.५ टक्के वाटा आपल्या नावावर करण्याचाही करार केला. या करारानुसार अदानी समूह जीव्हीके एअरपोर्ट डेव्हलपर्सच्या नावे असणाऱ्या अडीच हजार कोटींच्या कर्जासहीत विमानतळाचे सर्व हक्क विकत घेण्याचे निश्चित करण्यात आले. नक्की वाचा >> १० हजार कोटींना संपूर्ण मुंबई विमानतळ विकत घेण्याची अदानी समूहाची तयारी जीव्हीके आणि अदानीमधील कराराला भारतीय विमानतळ प्राधिकरणाने मागील महिन्यामध्ये हिरवा कंदील दिला. इतर काही खात्यांकडून अद्याप यासाठी मंजुरी मिळणं बाकी आहे. मार्च २०१९ मध्ये बिडवेस्टचे १३.५ टक्के वाटा अदानी समूहाला विकण्यासाठी एक हजार २४८ कोटींचा करार केला. जीव्हीकेकडून वाटा ताब्यात घेण्याची लढाई थेट न्यायालयापर्यंत गेली. मात्र जीव्हीकेने आपल्या विमानतळामधील ७९ टक्के वाटा विकून पैसे उभे करण्याचा प्रयत्न केला. तरी सीबीआयची चौकशी आणि इतर कायदेशीर बाबींमुळे जीव्हीके समूहाला पैसा उभं करणं जमलं नाही. अखेर कर्जाचा वाढते ओझे आणि इतर बाबी लक्षात घेत अदानींनाच हा वाटा विकण्यासाठी जीव्हीकेला राजी व्हावं लागलं. नक्की वाचा >> “लवकरच AAI म्हणजे ‘एअरपोर्ट अथॉरिटी ऑफ इंडिया’ऐवजी ‘अदानी एअरपोर्ट्स ऑफ इंडिया’ म्हणून ओळखलं जाईल” कोणती विमानतळं अदानी समूहाकडे? जयपूर आंतरराष्ट्रीय विमानतळ, तिरुअनंतपुरममधील त्रिवेंद्रम आंतरराष्ट्रीय विमानतळ आणि गुवाहाटीमधील लोकप्रिय गोपीनाथ बोर्डोलोई आंतरराष्ट्रीय विमानतळांची देखभाल करण्याचे हक्क अदानी समूहाला देण्यात आले आहेत. लखनऊमधील चौधरी चरण सिंग आंतरराष्ट्रीय विमानतळ, अहमदाबादमधील सरदार वल्लभभाई पटेल आंतरराष्ट्रीय विमानतळ, मंगळूरू आंतरराष्ट्रीय विमानतळाचे हक्कही अदानी समूहाला विकण्यासंदर्भात २०१९ साली फेब्रुवारी महिन्यातच करार झाला होता. लखनौ, अहमादबाद आणि मंगळूरु विमानतळासंदर्भात भारतीय विमानतळ प्राधिकरणाला सवलत देण्याच्या करारावर अदानी समूहाने १४ फेब्रुवारी २०२० रोजी स्वाक्षऱ्या केल्या आहेत. या विमानांचे खासगीकरण केल्याने फायदा होणार असल्याचे केंद्र सरकारने म्हटले आहे.