पार्थ पवारांच्या प्रचारासाठी लोणावळा शहरात अजित पवार आणि नवनीत राणा कौर यांनी पदयात्रा आयोजित केली. अजित पवार अनुपस्थित राहिल्याने भर उन्हात नवनीत राणा कौर यांनी प्रचार केला. यावेळी त्यांनी पार्थ पवारांचे खासगी फोटो व्हायरल करणाऱ्यांवर टीका केली. कोणामध्ये किती दम आहे ते निवडणूक निकालानंतर दिसेल असाही टोला त्यांनी लगावला. मावळ मतदार संघात युतीचे उमेदवार विद्यमान खासदार श्रीरंग बारणे आणि अजित पवार यांचे सुपुत्र पार्थ पवार यांच्यात काँटे की टक्कर पहायला मिळते आहे. ही निवडणूक पवार कुटुंबाच्या प्रतिष्ठेचे ठरणारी असल्याचं बोललं जात आहे. यासाठी महाराष्ट्राच्या कानाकोपऱ्यातून राष्ट्रवादीचे नेते मावळमध्ये ठाण मांडून आहेत. सकाळी लोणावळा शहरात पार्थ पवार यांच्या प्रचारार्थ नवनीत कौर राणा आणि अजित पवार यांची पदयात्रा आयोजित करण्यात आली होती. मात्र,अजित पवार या पदयात्रेला येऊ शकले नाहीत. नवनीत कौर राणा यांनी लोणावळा शहरातील छत्रपती शिवाजी महाराज यांच्या पुतळ्याला पुष्पहार अर्पण करून पदयात्रेची सुरुवात केली. सूर्य आग ओकत आहे सध्याचे तापमान हे ४१ अंशाच्या पुढे गेले असून अश्या उन्हात नवनीत कौर राणा यांनी पार्थ अजित पवार यांच्यासाठी पदयात्रेत सहभागी झाल्या. राणा यांच्या सहभागामुळे राष्ट्रवादीच्या कार्यकर्त्यांमध्ये उत्साह पाहायला मिळाला.