पुणे येथील उच्चशिक्षित तरुणाने येथील मध्यवर्ती बस स्थानक परिसरातील लॉजवर गळफास घेऊन आत्महत्या केली. रविवारी सकाळी ही घटना उघडकीस आली. दिनेश चंद्रकांत आरणे (वय ३९ रा. मंगळवार पेठ, ससून, पुणे) असे मृताचे नांव आहे. या घटनेची नोंद सीपीआर पोलीस ठाण्यात झाली. दिनेश आरणे शनिवारी कोल्हापुरात आले होते. आनंद मल्हार लॉजच्या १११ नंबर रुममध्ये ते उतरले होते. रविवारी सकाळी हॉटेलचा रुम बॉय दिनेश यांना उठविण्यासाठी गेला होता. मात्र आतून कोणताच प्रतिसाद न आल्याने रुमचा दरवाजा तोडण्यात आला. आत पाहिले असता दिनेश यांनी फॅनला गळफास घेऊन आत्महत्या केल्याचे निदर्शनास आले. कर्मचाऱ्यांनी तत्काळ शाहूपुरी पोलिसांशी संपर्क साधून घटनेचा पंचनाम केला. मृतदेहाच्या खिशातील ओळखपत्रावरुन ओळख पटली. दिनेशच्या पश्चात आई, वडील, बहीण असा परिवार आहे. दिनेश आरणे याने आत्महत्येपूर्वी पायावर पेनाने ‘पोस्ट मार्टम करणारे साहेब, जरा प्रेमाने फाडा, आधीच खूप फाटले आहे,’ असा मजकूर लिहिला होता. आत्महत्येचे नेमके कारण समजू शकले नाही. या मजकुरावरुन शोध पोलीस घेत आहेत.
