सलामीवीर अबिद अली व यष्टीरक्षक फलंदाज मोहम्मद रिझवान यांनी दमदार शतके झळकावूनदेखील पाकिस्तानच्या पदरी निराशा पडली. शनिवारी रात्री झालेल्या चौथ्या एकदिवसीय क्रिकेट सामन्यात ग्लेन मॅक्सवेलची झंझावाती खेळी व गोलंदाजांनी अखेरच्या क्षणी केलेल्या सुरेख गोलंदाजीच्या बळावर ऑस्ट्रेलियाने पाकिस्तानला सहा धावांनी पराभूत केले. प्रथम फलंदाजी करताना ऑस्ट्रेलियाने दिलेले २७८ धावांचे लक्ष्य गाठताना पाकिस्तानला निर्धारित ५० षटकांत ८ बाद २७१ धावांपर्यंतच मजल मारता आली. या विजयासह ऑस्ट्रेलियाने पाच सामन्यांच्या मालिकेत ४-० अशी आघाडी घेतली असून मालिकेतील पाचवा सामना रविवारी रंगणार आहे. ग्लेन मॅक्सवेलने ८२ चेंडूंत नऊ चौकार व तीन षटकारांसह झुंजार ९८ धावांची खेळी साकारली. त्याला उस्मान ख्वाजा (६२) व अॅलेक्स करी (५५) यांनी उत्तम साथ दिल्यामुळे ऑस्ट्रेलियाला ५० षटकांत आठ फलंदाजांच्या मोबदल्यात २७७ धावांपर्यंत मजल मारता आली. प्रत्युत्तरात अली (११२) व रिझवान (१०४) यांनी तिसऱ्या गडय़ासाठी १४४ धावांची भागीदारी रचत पाकिस्तानला पहिल्या विजयाच्या आशा दाखवल्या. मात्र अॅडम झम्पा व मार्कस स्टोयनिसने अनुक्रमे अली व रिझवानला बाद करत पाकिस्तानच्या विजयाच्या आशा धुळीस मिळवल्या. ९८ धावा करणाऱ्या मॅक्सवेलला सामनावीर पुरस्काराने गौरवण्यात आले. संक्षिप्त धावफलक ऑस्ट्रेलिया : ५० षटकांत ८ बाद २७७ (ग्लेन मॅक्सवेल ९८, उस्मान ख्वाजा ६२; इमाद वासिम २/५६) विजयी वि. पाकिस्तान : ५० षटकांत ८ बाद २७१ (अबिद अली ११२, मोहम्मद रिझवान १०४; नॅथन कुल्टर नाईल ३/५३). सामनावीर : ग्लेन मॅक्सवेल
