भारताच्या लोकेश राहुलने आयसीसीच्या टी-२० क्रमवारीत आपली सर्वोत्तम कामगिरी केली आहे. लोकेश राहुलने टी-२० क्रिकेटमध्ये फलंदाजीत तिसरं स्थान पटकावलं आहे. ऑस्ट्रेलियाच्या अॅरोन फिंचने पहिलं तर पाकिस्तानच्या फखार झमानने दुसरं स्थान आपल्या नावावर केलं आहे. झिम्बाब्वेत पार पडलेली तिरंगी टी-२० मालिका, भारत-इंग्लंड यांच्यात पार पडलेल्या टी-२० मालिकेनंतर आयसीसीने नव्याने आपली क्रमवारी जाहीर केली आहे. इंग्लंडविरुद्ध पहिल्या सामन्यात लोकेश राहुलने शतकी खेळी केली होती, मात्र दुसऱ्या व तिसऱ्या सामन्यात लोकेश राहुलला फारशी चमकदार कामगिरी करता आलेली नसल्यामुळे त्याला ८१२ गुणांसह तिसऱ्या स्थानावर समाधान मानावं लागलं. मात्र आपल्या याआधीच्या कामगिरीत सुधारणा करत लोकेश राहुलने क्रमवारीत ९ स्थान वर झेप घेतली आहे. आयसीसीची नवीन टी-२० क्रमवारी पुढील प्रमाणे असेल - १) अॅरोन फिंच - ८९१ गुण २) फखार झमान - ८४२ गुण ३) लोकेश राहुल - ८१२ गुण ४) कॉलिन मुनरो - ८०१ गुण ५) बाबर आझम - ७६५ गुण ६) ग्लेन मॅक्सवेल - ७६१ गुण ७) एविन लुईस - ७५३ गुण ८) मार्टीन गप्टील - ७४७ गुण ९) अॅलेक्स हेल्स - ७१० गुण १०) डार्सी शॉर्ट - ६९० गुण