सुटय़ा लागल्या की काय करू आणि काय नको असे मुलांना आणि त्यांच्याबरोबर पालकांनाही होते. सगळ्या उरल्यासुरल्या बेतांची यादीच तयार होत जाते. चला करू या सुटीचे नियोजन. साहित्य : आइस्क्रीमच्या काडय़ा २, एक जुनी रिकामी काडेपेटी, कार्डपेपर, कात्री, पुठ्ठा, गम, स्केच पेन. कृती एक जुनी रिकामी काडेपेटी घेऊन तिचे दोन्ही भाग वेगळे करा. चारही बाजूंना कार्ड पेपर चिकटवून काडेपेटीला नवे रूप द्या. खोलगट आतील बाजूस छोटा पुठ्ठा चिकटवा. कार्ड पेपरची काडेपेटीत मावेल एवढय़ा रुंदीची एक पट्टी घेऊन ती झिगझ्ॉग (कागदी पंखा बनवण्यासाठी दुमडतात त्या प्रमाणे) करून दुमडा. दुमडलेल्या पट्टीचे एक टोक काडेपेटीच्या आतील भागात चिकटवा. पट्टीचा उर्वरित भाग तसाच मोकळा सोडा. आइस्क्रीमच्या दोन काडय़ा समांतर उभ्या धरा आणि त्यावर माचिसचे दोन भाग वर व खाली चिकटवा. वरील भागावर तुम्हाला हवे ते शीर्षक लिहा. खाली चिकटवलेल्या डबीतील कागदावर सर्व कुटुंबीयांना त्यांचे सुट्टीचे बेत लिहायला सांगा. अशा प्रकारे घरातील सर्वाच्याच सुटीचे नियोजन घरातल्या वाया जाणाऱ्या साहित्यापासून करता येऊ शकले. घरात सर्वाच्या सहज नजरेस पडेल, अशा ठिकाणी ही कलाकृती ठेवा, म्हणजे सतत स्मरण राहिली आणि कोणताही बेत राहून जाणार नाही. सगळ्यांची सुट्टी आनंदात जावो. apac64kala@gmail.com
